SDCA in Serchhip Zikhlum hralh dan an chhui; Tun aia tlawm-a mipui hnenah hralh turin an ngen

Serchhip District Consumers Association (SDCA) chuan ‘Vegetable Supply Chain Programme’ hnuaia Serchhip Zikhlum hralhchhuah chungchangah Serchhip Zikhlum chingtute leh hralhtu lam ten thiamlohna an neih awm an hriatloh thu sawiin, sawrkar in tun aia tlawm deuh hian mipuiah hralh thei se an duh thu sawiin sawrkar chu an ngen bawk.

Serchhip District Consumers Association chuan Serchhip-a Zikhlum leh thlai thar te tunhnaia ‘Vegetable Supply Chain Programme’ hnuaia Aizawl lamah a hlawma phurh thlak chungchangah sawiselna neuh neuh a awm thu leh, Social Media-a thu post thenkhatah Serchhip a Zikhlum chingtute demna ang zawnga ngaih theih tura sawi a awm bakah hah taka duty, Aizawl lama Local Task Force te demna lam rawngkaia sawi te a awm thu sawiin, hemi chungchang hi zirchianna an neih thu an sawi a. March 31, 2020-a Serchhip Pick up (MZ-06-3956) in Aizawl-a Zikhlum a phurhthlak chu Nursery Veng Local Task Force hnena hralh tura kalpui nghal niin, Supplier (Department) lam hian Driver hnenah a thil phurh man hi Rs. 58,935/- receipt pein alo changtu Local Task Force te chuan he Trip khat man-ah hian Rs. 79,535/- an pek thu leh Pick up trip khat-ah hian a buaipuitu lam hian Rs. 20,600/- an lo hlep tihna a ni tih an sawi a.

March 31, 2020 khan Serchhip Pick Up (MZ-03-6998) chuan Serchhip Zikhlum hi Aizawl-ah phurthla bawkin Department lamin a Driver hnena a thil phurh man receipt an pek chu Rs. 60,970/- a nih laiin Local Task Force-in an khulna erawh chu Rs. 86,820/- a ni thung tih sawiin, a inthlauhna hi Rs. 25,850/- a ni tih an sawi bawk a. Department lam hian Zikhlum, loneitute tharchhuah hi Kg. ah Rs 25-30 a la angin an insawi laiin Aizawl-a Local Task Force hnenah Kg. ah Rs. 40 in an hralh chhuak leh a, Kg 1 ah Rs 10-15 zel an hlep tihna a ni, an ti bawk.

SDCA chuan Serchhip inZikhlum an pekna leh Aizawl lama sawrkar lamin an lo khar tirna ah Pick-up trip khat-ah Rs. 20,000/-chuanga inthlauhna awm chungchangah hian MIZOFED Aizawl lama hotute chuan a rate hi anmahni siam anih loh thu leh Vegetable Supply Chain Committee thutlukna ang leh Trade and Commerce lam atanga thurawn anga ti an nih thu an sawi tih sawiin, Aizawl Tuikual North Local Council te chuan Zikhlum an lakchhuahna hi a to avangin Serchhip Zikhlum hi lak an tum tawhloh thu an sawi thu leh Horticulture Office kawt-ah mipui tan an lo zuarchhuak leh vak tho si chu thalo an tih thu an sawi tih an sawi bawk.

He thil an zirchianna atang hian Department lamin Serchhip Zikhlum an lak te Local Task Force lama an semchhuahna rate hi a to hle tih hriat a ni tih sawiin SDCA chuan, “COVID-19 avangin mitin kan buai a, sum thawhchhuah theih anih loh avangin mitin in sum kan renchem a, sawrkar lamin thlai thar hralhna a ruahman a, kan lawm viau lai hian loneitute atanga lachhawngtu sawrkar lam hian a hralhchhuah lehna rate hi hei aia tlawm deuh hian mipuiah hralh thei se tih hi Consumer Association te chuan mipui aiawhin kan ngen a ni,” an ti bawk.

Hetihlai hian nimin khan Serchhip-ah District Supply Chain Management Committee chu District Bawrhsap, H. Dolianbuaia hova thukhawmin Serchhip Mat phai-a thlai tharte chu Mizoram hmun hrang hranga thawnchhuah mek zel niin, Zikhlum, Bawkbawn leh Tomato te chu man to uchuaka hralh an awm thu report ngaihtlak a ni bawk a. Heng thlai tharte hi MIZOFED in an lakchhawn thu leh MIZOFED hian Zikhlum kg. 1 zelah Rs. 30 leh Bawkbawn kg. 1-ah Rs. 25-a lain, an hralh zui dan hi Serchhip lamin an hriatpui zui tawh loh thu sawilan a ni bawk a. Thlai thar te hi chawlhkar tin Thawh-tanni leh Zirtawpni-ah te Aizawl-a thawn thlak thin niin, hmun danga atanga la turte tan Nilaini ah lak tir nise tiin an rel bawk.