RAM LAMA LOCKDOWN VE A NGAI TAWH E

RAM LAMA LOCKDOWN VE A NGAI TAWH E

- Laldinpuia

COVID-19 avangin kan ram a ralti a, mipuite he hri kan kai ve hlauvin pawn chhuak lo turin kan inkharkhip a, kan Local Task Force ten theihtawp chhuahin mahni inlum pawh thlahlel hlei thei lovin an duty a, an fakawm hle mai. Sawrkar thupek-in Lo lama hnathawk te chhuah zalen an ni a, Lo lama hnathawk lemlo, luidung leh ramhnuai vela tei rawlai mai mai tur pawh engemaw chhuanlamin an chhuak teuh ni awm tak a ni. Heng hian kuthnathawktute an timualpho a, Dan an palzut a ni. In lama fimkhur em em si khan ram lamah chuan fimkhur nachang hre lovin kan kalho dul dul a, kan zalen ta em em ni berin a lang.

Hri pui hlaua vengchhung-a hah taka duty anih mek laiin ram lamah kang thelh tur a awm deuh reng a, khawtlang huapa kang thelh hnatlang koh a ngai te hi a pawi hle mai. Heng ram kang te hi In lamah inkharkhip vek ila a kang lo mai tur, kan Loneitu kuthnathawkte tihkan anih a rinawm loh. Social Media velah lungdung suasam anih thu te, Sangha humhalh lai hrai anih thu te, Sava leh nungcha kah a nih thu te, mi huan thlai leh Sangha Dil suasam anih thu te kan hmu ta nuk mai. A va han pawi tak em! Mizo te hian engatinge ram leh hnam humhalh tur hian tanrual nachang kan la hriat theih miahloh le? Hah taka kan aiawha ralvengtute zah nachang pawh hre lovin In-a inkhung tur ten luidungah nuam kan chen a, kan thlalak kan post darh chuai chuai a, kan la intithei zawk mah lehnghal. Hnam tangrual theilo tak kan lo ni reng zawk em ni?

Kan ramah hian sawrkar hnathawk kan tam tehreng nen hian kan duty te hmel han en ila, sawrkar hnathawk hlawh tam tak tak te aiin thla bi hlawh nei lemlo, lockdown avanga hnathawk theilo leh mi tlawmngai te hmel a tam zawk daih te hi a mak hle mai. Sawrkarin Lockdown a puang a, Task Force a din a, sawrkar hnathawk thenkhat hian kan Office kal theihloh hi tlawmngaia Task Force a duty ai chuan mahni In-a tawm emaw, ram lama kal emaw te hi kan thlahlel zawk tlat ni hian a lang. Ram leh hnam chhan nan ralven a ngai a, ralveng tur kan indaih lo. Chutih lai chuan insurance tha tak tak hum run chungin duty te hmuh loha ram lama intawllen tura chhuahruk dan phet kan zawng a, insurance nei ve lo, inhlawhna hmuhloh huna chaw nghei mai tur te kan aiawhin an duty a, zah nachang hrelo kan va tam si em!

Nitin kuthnathawktute hian ram an hal mai mai lo, luidung-ah Tur phulin an suasam phallo, Sava te an kap mai mai ngai lo. Mahse heng thil hi kan luidung-ah te, kan ram ngaw-ah te a thleng mek a ni, a titute hi tute nge? Heng kan luidung te, ramngaw leh nungcha te tuna Lockdown denchhena kan lo suasam vak mai hian kan tu leh fate pawi kan khawih tih hi i hria ang u. Kuthnathawktute ei leh bar zawnna kan tihchhia a, kan luidung-ah Tur kan phul a, nungchate kan tihhlum hian keimahni a nghawng let dawn a ni. Kut hnathawktute thlai tharchhuahin a tuar ang a, kut hnathawktute tel lova awm theilo mi hausa ten a sawh-khawk an tuar bawk ang. Sum leh pai leh nawmchenna kan zawn lutuk avanga kan ram leh nungchate kan suat zel hian nakinah pawi nasa tak a thlen dawn a, kan harhchhuah hunah meuh chuan a sawhkhawk kan tuar hman teuh tawh ang.

Hawh u, pawisa leh nawmsakna ringawt ngaihtuahlo hian kan ram leh hnam dinchhuahna tur, nakin zela ei leh bara kan hnianghnar theihna tur lama ngaihtuahna kan sen a hun tawh hle mai. Hetiang lam hawi ngaihtuahna sengtu nih i tum theuh ang u. Kan sawrkar lam hian luidung leh ramhnuai-ah te tun lockdown chhung hian duty intirin silai keng te, dynamo leh Tur hmanga sangha mantute, ram tikanga ti chereu tute hi dimna tel hauh lovin an chungah Dan hmangin hremna han lekkawh se a va tha dawn em! State pawn atanga hnamdang lut tur kan dan a, khawlaia khawchhung mite chhuak tur kan dan piah lamah hian ram lama kan ram leh hnam pawikhawihtute hi kan ven tel a tul ta hle mai. Kan kuthna-thawktute tibuailo zawngin ram lam hi lockdown a ngai ve tawh a ni.

“Only when the last tree has been cut down, the last fish been caught, and the last stream poisoned, will we realize we cannot eat money.” - Cree Indian Prophecy