Chanchin thar thenkhat :

Ramri venhimna sawiho

Mamit-ah nimin khan District Level Task Force on COVID-19 Chairman, Dr. Lalrozama hovin District Level Task Force Member te leh Sub-Hqrs. YMA Mamit chuan COVID-19 avanga Mamit District ramri venhimna chungchangah inkawmhona an nei a. He hunah hian Mamit Sub-Hqrs. YMA hmalakna in Langkaih Group YMA leh Taitesena Group YMA hnuaia khaw hrang hrang tlawmngai pawl leh Police, tuna ramri veng-a duty-te dinhmun leh harsatna tarlan a ni a. Police Force indaihlohna a nasat thu tarlan niin Police Hqrs. atanga Armed Police Force 70 hmuh belh tur chungchang leh a sem darh dan turte pawh sawiho a ni a. Ramri veng tura tlawm-ngai-a chhuak te chu Silai keng lo turin an ngen nghal bawk. Hei bakah hian Damdawi leh ruihhlo ngai ten ramdang-a ruih tur zawnga an kalna ah hri an kai palh thei tih sawiin, hriat loh kara nasa taka punlun thei a nih avangin ruihhlo ngaite quarantine dan tur ngaihtuah nise an ti bawk.

Committee din belh leh
Mizoram sawrkar chuan COVID-19 dona kawngah 'Committee for Promotion of Locally-Manufactured Protective Gears' a din thar leh a, he Committee-ah hian Planning Secretary, Dr. C. Vanlalramsanga chu Chairman niin COVID-19 hripui do nana hmanrua, tualchhung a siam hmai khuhna, kawrfual leh a dangte siam kawngah hma ala ang a, Health & Family Welfare Department leh Task Group on Medicine & Medical Equipments te nena inrawna hma la tura hriattir an ni.

Kolasib-ah thlai chi sem
COVID-19 avanga Lockdown kalpui mekah Agriculture Department chuan nimin khan kut-hnathawktute tan Kolasib-ah a thlawnin Thlai chi an sem a, he hunah hian Thlai chi hrang hrang 19 chi Rs. 80,000/- man zet semchhuah niin chhung-kaw 176 zetin an dawng a ni. Hemi hmalam hian Vairengte-ah pawh Thlai chi Rs. 14,000/- man zet chu Agriculture Department hian an lo sem tawh bawk a ni.

HSSLC Exam hun tur bithliah
Mizoram Board of School Education (MB-SE) chuan Higher Secondary School Leaving Certificate Exam kal mek chhunzawm theihloha awm chu April 22, 2020 atanga chhunzawm turin ruahmanna a siam a, Exam hi chawhma dar 10:00 atanga chawhnu dar 1:00 thlenga neih tur niin April 22-ah Economic/Chemistry (T), April 23 ah Sociology leh April 24-ah Computer Science (T)/Home Science (T) te exam tur a ni ang.

COVID-19 enfiahna lo thleng
Novel Coronavirus hrik pai leh pai loh enfiahna hmanraw pakhat, Viral Transport Media (VTM) chu Mizoram chuan Indian Council of Medical Research (ICMR) atanga 1800 zet hmuin nimin khan Indian Air Force (IAF) thlawhna hmanga Lengpui Airport rawn phurh thlen a ni a, heng bungrua rawn thleng te hi a vaiin Kg. 32 niin nimin vek khan Zoram Medical College-ah lak nghal a ni.

Police ten sum thawhkhawm
Mizoram Police hnuaia thawk te chuan Mizoram-a COVID-19 dona kawnga hmalakna atan an nikhat hlawh theuh thawhkhawmin a vaiin Rs. 1,41,64,972/- chu nimin khan Chief Minister, Zoramthanga hnenah an hlan.

Comments

Chhiar Hlawhte