Larsap in Padmashree Award dawngtu a kawm

Mizoram Governor, P.S. Sreedharan Pillai chuan kumin Republic Day-a Padmashree Award dawngtu, Lalbiakthanga Pachuau, Prominent Journalist chu Inrinni tlai khan Raj Bhavan-ah kawmin thingpui ruai nen a hlawhtlinna a lawmpui a. Lawmpuina thuziak bakah tangkafai a hlan bawk.
Governor P.S. Sreedhara Pillai chuan India ram mipui vbc. 134 zingah Mizoram mi pahnih India rama vantlang inchawimawina sang ber pali dawngthei kan nei chu thil ropui tak a nih thu leh an chhuanawm em em tih a sawi a. Lalbiakthanga Pachuau chu hunrei tak mipui rawngbawla theihtawp chhuah thintu a nih thu pawh sawiin, a hnathawh that te Rash-trapati Bhavan in an lo hria an chawimawi chu thinlung takin a lawmpui tih a sawi a. Lalbiakthanga Pachuau nun atang hian keini khua leh tui te pawhin entawn tur kan nei tih sawiin, a rawngbawlna chu state mipui leh India mipui tan a ni mai lova, Democracy tan rawngbawlna ropui tak a ni, a ti a. A hnathawh that hi Mizoram mipui leh a thawhpui Chanchinbumite zawng zawng tan inchhuanna tham a nih thu a sawi bawk.
He hunah hian Lalbiakthanga Pachuau, Padmashree Awardee pawhin a lawmman dawn chungchangah a hmasa berin Pathian leh mipuite hnenah lawmthu a sawi a. A suangtuah ngai miah loh chawimawina a dawn avang leh a beisei ngai loh Governor lawmpuina leh duhsakna Raj Bhavan-ah a dawng chu thinlung taka a lawm thu a sawi a. He chawimawina a dawn theihna ah hian a thawhpui chanchinbumite zawng zawng phung-bawmna leh kaihruaina ah lawmthu sawiin, a thawhpui tho Association of Voluntary Blood Donation (AVBD), Mizoram leh Mizoram Social Defence Council te pawhin theihtawpin an vawrh sang a, chawimawina sang tak a dawn theih phahnaah pawh a lawm thu a sawi bawk.
Padmashree Award hi India khua leh tui mi chhuanawm leh hnathawk tha chungchuangte chawimawina sang ber zinga mi a ni a, Bharat Ratna leh Padma Vibhushan leh Padma Bhushan tih lohah chuan ngaihhlut ber a ni a. Kumin hian Lalbiakthanga Pachuau, Prominent Journalist chuan he lawmman hi Pu Ramnath Kovind, President of India hnen atangin a dawng dawn a ni.
Lalbiakthanga Pachuau hi March 25, 1927 khan Saichal khuaah nupa tuak, Satkunga (L) leh Dokungi (L) te inkarah a lo piang a. Amah hi World War-II veteran niin Sipai huaisen chawimawina Indopui Pahnihna Tangkapui (World War II Medal), Burma Star, Independence Medal, Jammu & Kashmir Medal, Sainya Seva Medal leh a hnathawh that avanga chawimawina dangte pawh dawng a ni. Amah hi ram hmasawnna atan leh mipui vantlang rawngbawlna atana a hun pumhlum hmangtu a ni a. Hlawhtlinna tam takah a bul tantu, sulsutu leh hmahruaitu a nih bakah vantlang rawng-bawltu tlawmngai pawl hrang hrangah nihna nei tawh leh nei mek a ni.

Comments

Chhiar Hlawhte