Coronavirus chu WHO in PHEIC-ah puang tawh

Mizoram-ah he hri hi ala rawn lut lo thung

Mizoram sawrkar Health & Family Welfare Department-a Principal Secretary chuan Novelcoronavirus hrileng chu WHO chuan Public Health Emergency of International Concern (PHEIC)-ah puang tawh tih sawiin, India ramah a vei hmuh ni tawh mah se he hri leng hian Mizoram a la rawn lut lo tih a sawi.

Hemi chungchanga nimin a thuchhuah a siamah H&FW Department-a Principal Secretary, F. Lianhlira chuan Novelcoronavirus hrileng chu tunah hian ram 27-ah kai awm mahse China bikah a vei tam berin tun dinhmunah mi 16,831-ah a hrik hi hmuh ni tawh mah sela thihpui erawh mi 362 chauh an la ni tih a sawi a. India rama Kerela State-ah mi pahnih-ah a hrik hi hmuh ni tawh mahsela thihpui an awm loh thu leh he hri leng hian Mizoram a la rawn lut lo tih a sawi a. Mizoram sawrkar chuan theihtawp chhuahin he hrileng laka inven leh dolet turin theihtawp a chhuah reng a. January ni 30 khan Health Minister Dr. R. Lalthangliana hovin State Level Meeting pawh neih niin Meeting chuan task Force dinin hmalak tulna apiangah hma an la chho mek a. Sawrkar Laipui lama coronavirus hrileng buaipuitute nen pawh nitin inbe pawpin hmalakna report-te pawh thawn thin a ni a. Lengpui Airport-ah ramdang atanga khualzin lo lut, a bik takin China atanga lo kalte chu ngaihven zual bik an ni tih a tarlang.

China ram hi sumdawng leh zirlai engemaw zatin an tlawh pawh avangin Kolkata Airport lo thlengte chu an hriselna endik hmasak thin an ni a. Airport screening hi tun dinhmunah hmun 21-ah kalpui mek a nih thu tarlangin, hetiang hian Lengpui-ah pawh hian hmalak a ni ta a ni.

Lengpui Airport bakah hian Zokhaw-thar lamah pawh khualzin endik hna hi thawh chhoh mek niin, a tul angin hmun dangah te pawh hma lak zel tum a ni a. State Level task Force bakah District tinah Coronavirus hrileng a awm palh pawha lo hmachhawn turin District task Force din tura hmalak a nih thu pawh a tarlang bawk a. thuthang nazawng avanga mipuite chiai lo tura ngenin, Social Media lama mi pahnih, quarantine-a awm mek nia sawite pawh hi an damloh avang ni lovin fimkhur thuhla-a pawn chhuak rihlo tura tih mai an ni tih a sawi bawk.