I&PR leh MJA thawhho thinna lawmawm tih thu sawi

Information Minister, Lalruatkima chuan Information & Public Relations Department leh Mizoram Journalist Association ten thawhhona tha tak an nei thin chu lawmawm a tih thu a sawi.

Inrinni kalta a Information & Public Relations Department leh Mizoram Journalist Association (MJA) ten Aizawl Sipai Lammual-ah Football Friendly Match an khelh a hmanpuina ah he thu hi sawiin I&PR Minister, Lalruatkima chuan sawrkar hmalakna hrang hrang puanzar kawnga mawhphurhna pawimawh tak chelhtu Information & Public Relations Department leh Mizoram Journalist Association (MJA) ten thawhhona tha tak an nei thin chu lawmawm a tih thu a sawi a, thawhhona leh inunauna tha zawk neih nan infiamna thianghlim an nei chu thil tha tak a ni, a ti. I&PR Minister chuan hna tha taka thawk thei tur chuan hriselna tha neih a pawimawh thu sawiin, infiamna leh taksa sawizawi uar turin a fuih a, tun tuma MJA leh Information & Public Relations Department ten ruahmanna tha tak an siam hian inunauna tha zawk a thlen ngei a duh thu a sawi bawk.

I&PR Directorate-a thawk te leh MJA General Hqrs. hian kum engemaw chen kalta atang khan hetianga inkhelhna hun hi an lo buatsaih tawh thin a. Inrinni-a an inkhelh-ah hian hun pangngai ah 4-4 a inhnehtawkin Penalty Shoot-out hmanga chak zawk zawn niin I&PR Department hian 4-2 in hnehna an chang a ni.