Civil Service ten Sawrkar chak leh chak lo neihna ah mawhphurhna sang tak an nei - RD Minister

Rural Development Minister, Lalruatkima chuan Civil Service te chuan Sawrkar chak leh chak lo neihna kawngah mawhphurhna sang tak an neih thu a sawi.
State Institute of Rural Development & Panchayati Raj (SIRD & PR), Durtlang-a Mizoram Civil Service Officers (2019 Batch) te tana Rural Development kalpui dan, a bik taka zirna tun thla ni 20 thleng awh tur hawnna nimin a neih a hmanpuina ah a sawi a, he hunah hian RD Minister chuan India ram zalenna sual chhuaktu ropui tak Sardar Vallabhbhai Patel chuan India hian Civil Service tha tak leh lehkhathiam hnathawk tur a neih loh chuan in enkawl a har tur thu a lo sawi tawh tih sawiin, hei hian Civil Service pawimawhna a sawi chiang hle a ni, a ti a. Mizoram-ah ngei pawh State Civil Service te hian State hmasawnna leh hmalam hun atan pawimawhna nasa tak an nei tih hre thar leh tura ngenin an thiamna leh he dinhmun thleng tura an kawng zawh chu thil awlsam a ni lova, mi bik an nih zia tarlanna nia a hriat thu a sawi bawk a. Legislators te chuan Policy leh Sawrkar kaldan tur tul angte an duang a, chu Dan leh hmachhawp duansa chu Executive te bawhzui tur a ni  tih sawiin Minister chuan, Legislators te an pawimawh em em rual hian Executive Officer tha tak tak te pawhin Sawrkar chak leh chak lo neihna kawngah hian mawhphurhna sang tak an nei a ni, a ti.
Hei bakah hian Minister chuan Conduct Rules leh sawrkar hnathawk kaihhruaina dan hrang hrangin a sawi te zawm tlat tur te, Public Servant an nihna anga mipui tan harsatna siamtu ni lova mite tana malsawmna nih tum tur te, mipui rinngam leh nungchang pawh uluk turin MCS Officer te chu a ngen bawk a. Sawrkar tana theihtawp chhuah leh rinawm taka thawk tura chah bawkin, State Service bakah Central Service thleng pawha beidawng lo a, tumruhna nen ram tana exam chhunzawm zel turin a chah bawk.
Tun thla ni 20 thleng awh tur he Training hawnna hun hi SIRD & PR Director, Lalhmunsanga Hnamte chuan a kaihruai a, Senior Core Faculty (RD) Dr. Margaret Lalbiakthangi chuan Training Course report a pe a, ATI Joint Director, Angela Zothanpuii pawhin Mizoram State Civil Services Foundation Course chungchang te sawiin, fuihna thu tawi a sawi bawk a. Senior Core Faculty (Agri) chuan lawmthu sawiin he hun hi a khar a ni.

Comments

Chhiar Hlawhte