Lok Sabha MP in Model Village atana a thlan tlawh

Lok Sabha MP, C. Lalrosanga chuan nimin khan Sansad Adarsh Gram Yojana (SAGY) hnuaia Model Village atana a thlan, Muallungthu khua tlawhin khawtlang hruaitute nen an khawtlang hmasawnna tura hmalakna tur hmunhma hrang hrang enin inkawmna an nei bawk.

Lok Sabha MP, C. Lalrosanga chuan khawhlun tak mai Model Village atana a thlang thei chu amah pawhin lawmawm a sawi a. Bialtu MLA leh khawtlang mipuite nen theihtawp chhuahin hmasawn turin tan an la tlang dawn tih sawiin, MP Fund piah lamah Central Sawrkar Scheme hrang hrangte pawh Muallungthu khawtlang tih hmasawn nan haichhuah tum a nih thu a sawi a. Model Village a siam tura hmalakna turah thurawn inpek tawn a tul thu sawiin, khawtlang hmasawn nan khaw-tlang hruaitu te chu an pawimawh hle a ni tih hi in hre thar turin a chah a ni.

He hunah hian bialtu MLA, Dr. F. Lal-nunmawia pawhin a bial chhung ami Mual-lungthu khua Model Village atana Lok Sabha MP in a thlang chu vanneithlak a tih thu sawiin, a thlangtu MP chungah lawmthu a sawi a. Midangte entawn tlak Model Village ni tur chuan hmuh theih hmasawnna piah lamah rilru chhungril tih hmasawn a tul thu sawiin, “NLUP emaw SEDP emaw atangin nuai 5 pawh sem mah ila rilru chhungril tak atanga chhuak hmasawn tumna kan neih chuan si loh chuan awmzia a awm lovang,” a ti a. Sum sen hek ngailo leh sum nghahchhuah ngailo tun a tih nghal theih faina leh thianghlimna kawnga bul tan nghal turin khawtlang mipuite a sawm bawk a ni.

Nimin a Lok Sabha MP in Muallungthu a tlawhna ah hian khawchhung hmun hrang hrang tlawhin inkawmkhawmna hi Muallungthu YMA Run-ah neih niin sawrkar lam hotute pawh an tel bawk a ni.