MBBS zirlaite hman tura MBBS syllabus thar zirhona ZMC Teaching Faculty ten an nei

Zoram Medical College-in kumin a\anga MBBS zirlaite hman tura MBBS syllabus thara siam, Competency based Medical Education chungchang zirhona ZMC Teaching Faculty te tana a buatsaih chu nimin khan neih \an a ni a, Mizoram sawrkara Health & Family Welfare Board Vice Chairman, Dr. ZR. Thiamsanga, MLA chuan khuallian niin a hmanpui a ni.

He zirhona ni thum (3) chhung awh tur hawnna hun nimin a Faculty Reading Hall, Library Administrative Block-a neih ah hian khuallian, Dr. ZR. Thiamsanga chuan Medical College-a thawhhona \ha leh damlo enkawlna lama thiamna sang zawk neih theihna tur leh Medical zirna lama hmasawn zelna tur atan te hetiang ruahmanna siam a ni chu lawmawm a tih thu sawiin, Society-ah Medical lam mithiamte chu hmun pawimawh tak chang an nih avangin he program pawh hi Medical College-a zirlaiten an chhawr zui theih tur puakchhuahna ni ngei turin a duhsak tih a sawi a. Chief Minister, Zoramthanga thil ngaihpawimawh zingah Health & Family Welfare leh Education a tel avangin ZMC tihchangtlun zelna atan pawh State sawrkar a inhawng hle tih Dr. ZR. Thiamsanga chuan sawiin, tun Budget-ah cheng vbc. 60 ruahman a nih thu te, mamawh leh \ul tam tak ala awm tih sawrkarin a hriat avangin tun a\anga thla reilote ah hmasawnna hmel thar a hmuh chhoh zel a beisei thu te a sawi a, Health & Family Welfare Board a taka a kal chhoh hunah phei chuan ZMC chu World Class Medical College a nih ngei theih nan tan lak an tum thu te a sawi bawk.

He hun kaihruaitu ZMC Director, Prof (Dr.) L. Fimate chuan Medical lama hmasawn zelna tura Doctor-te Service \ha zawk leh theihna sang zawk an neih theihna atan MCI-in hma a lakna kal mek ZMC-in a lo chhawr ve thei leh a vawikhatna atana hetiang program buatsaih a ni chu lawmawm a tih thu a sawi a. MCI Regional Centre, Jorhat-a Convener, Dr. Purnima Barua pawhin he hun hi MCI Observer nia rawn hmanpuiin ZMC din a ni chu lawmawm a tih thu leh he Medical College hmasawnna chu Mizo-ram tan mai ni lo hmarchhak pum tan thu lawmawm a ni tih a sawi a. Hmabak hlen tur tam tak la awm mah se ZMC Director leh a thawhpuiten theihtawp an chhuahna chu fakawm a tih thu a sawi bawk.

Curriculum thar zirho turah hian ZMC Faculty - Prof. (Dr.) Nagendra Nayak, Dr. Manoj Patki, Dr. Nirensingh Koch, Dr. F. Elizabeth Lalhmangaihzuali leh Dr. Lalrinfela ten zirtirna an pe dawn a ni.