Mizoram hmun hrang hrangah Zoram Ni urhsun takin hman a ni

India sawrkar in Aizawl khawpui Bomb hmanga a beihna ni champha, March 5 chu MZP in ‘Zoram Ni’ atana a hman \hin angin nimin khan Zoram Ni vawi 11-na chu hmun hrang hrang ah hman a ni.

MZP General Hqrs. chuan Zoram Ni hi Dawrpui Multipurpose Centre-ah hmangin he hun hi Home Minister, Lalchamliana chuan khuallian niin a hmanpui a, Home Minister chuan hmasang ata tun thlengin Mizote chu tu thuhnuai ah mah kan kun ngailo tih sawiin, “Mahni-a ro inrel hnam kan ni. British-in sipai chakna hmangin min awpbet a, min chhuahsan dawnah India-in fing vervek takin kan hruaitu hmasate an thlem thlu a, India danpui an siam pawhin Mizo aiawh tumah an tel lo, a tawpah inthiamchawp nan kan hruaitu te mi pahnih (2) an ruat ve chauh a ni. Chuvangin India Danpui hi Mizote tan chuan Barhlui Danpui a ni,” a ti a. “Kan ramah Indian Nationalism leh Mizo Nationalism a in sual mek a, \hangthar te thinlungah Mizo Nationalism a piang thar leh hi ka lawm hle a ni,” a ti bawk.

He hunah hian MZP General Hqrs. President, L. Ramdinliana Renthlei chuan, “Mizoram in hun khirh ber a tawh lai chu, India sawrkar-in Jet fighter hmanga dimdawina tel miah lova min bomb kha a ni,” a ti a. Mizoram in Zalenna a sual thu sawiin, “India sawrkar-in rambuaiah min puang a, vai sipai ten an duh duh danin kut min thlak a, khua min hal saka, kan buhzem thlengin min hal sak a ni. Chu mai duh tawk loin Mizo nula min pawngsual sak a, nula mai duhtawk lovin nu leh tar thlengin min pawngsual sak a ni,” a ti a. Hemi avanga Mizote rilru natna chu tun thlengin a la dam lova, \hangthar te nunah ser a la nung reng tih sawiin, chuvang chuan India sawrkar hian Mizo mipuite lakah hian ngaihdam a dil tur a ni tih chu MZP duh dan a la ni reng a ni, a ti bawk.

Zoram Ni hi MZP Sub-Hqrs. Reiek pawhin Convention Centre, Tourist Resort Reiek-ah hmangin ZPM MLA, Lalduhoma chuan khuallian niin a hmanpui a, he hunah hian Lalduhoma chuan Vawiin-ah hian Zoram zalenna atana nunna chan te an hrereng tih sawiin, an sunin zahna an hlan tih a sawi a. “Zofate hian zalenna kan duh em em a, amaherawh chu kan duhthlanna ni lovin British sawrkar hnuaiah min luhtir a, kan duhthlanna lo vekin India sawrkar hnuaiah kan lut leh a, mipuite min rawnna telloin MNF leh India sawrkar inremna in India state kan ni leh ta a ni,” a ti. He hunah hian Zoram zalenna atana nunna chantate sunna hun hman a ni a. Zalenna atana Signatory zinga Reiek khaw pa pathum, C. Lalkhawliana, Finance Minister, Zoramthanga, Member of Parliament leh R. Zamawia, Defence Minister & Army Chief te hnenah chawimawina hlan a ni bawk.