CSS Hindi Teacher tan sawrkar in hma la zel

School  Education Minister, Lalchhandama Raltea chuan CSS hnuaia Hindi Teacher ban tak te kha Mizoram sawrkar chuan lak leh ngei a duh a, theihtawpin Central sawrkar lamah lak leh an nih theihna turin hmalakna kalpui a nih thu a sawi.

Assembly Session neih mekah Palak bialtu MLA, KT. Rokhaw zawhna chhanga he thu hi sawiin Education Minister chuan CSS Hindi Teacher ban tak mi 1305 te chu rawih an nih leh ngei theihna turin Mizoram sawrkarin hmalakna a kalpui tih House a hrilh a, tunhnaiah Chief Minister Zoramthanga chuan Union Home Minister Rajnath Singh chu hemi chungchang hi a sawipui tih tarlangin, Higher & Technical Education Minister pawhin HRD Minister a sawipui tawh bakah, Official te leh amah ngei pawhin hemi chungchangah hian hmalakna an kalpui mek niin a sawi.

Member te zawhbelhna chhangin Lalchhandama Ralte chuan, CSS Hindi zirtirtu mi 1305 te ban an nih hun kha kum khat chuang a ni tawh a, vanduaina tawk a boral tawh te leh hna dang thawk tawh mi engemaw zat an awm tih sawiin, April 1 a\anga dan thar hman tur Right To Education Act hnuaiah Train Teacher te chauh zirtirtu an nih theih tawh dawn vangin, Dan anga CSS Hindi Teacher lak phalna hmuh a nih pawhin, qualified te chauh lak an nih tur thu Education Minister chuan a sawi.

SSA zirtirtute hlawh chungchang pawh sawrkarin a ngai pawimawh tih Lalchhandama Ralte chuan sawi bawkin, an sawrkar a\anga ni 4-na ah SSA zirtirtute thla 4 hlawh sawrkar hmasa in a bat chu an pe nghal vek tih a sawi a, tunah hian an March thla hlawh pawh sawrkarin a nei vek tawh niin a sawi bawk.