Union Cabinet in pawm ta

Prime Minister, Narendra Modi hova nimin a Union Cabinet \hukhawm chuan India Danpui Article 280 leh Sixth Schedule siam\hat a remti.

Nimin a Union Cabinet \hukhawm in thuthlukna an siam a\ang hi chuan Assam, Meghalaya, Mizo-ram leh Tripura-a Autonomous District Council te thuneihna hnuaia an sum hman dan leh sawrkar thuneihna te an kutah a tam zawk dawn a, hei hi North East State ten hun rei tak chhunga an lo beisei tawh a ni. Sawrkar laipui hnuaia awm Finance Commission hian heng state-a awm Autonomous District Council, Village leh Municipal Council Sixth Schedule hnuaia awm te hi thuneihna thar tur hi a enpui dawn a. Hetianga kalpui anih chuan heng tualchhung sawrkar ah te hian daltu awm lovin an hnathawhna tur sum hi a lut tawh dawn a ni. Hei bakah hian Assam, Meghalaya, Mizoram leh Tripura-a State Finance Commission te thuneihna pek belh an ni bawk.

He rawtna in a tum pawimawh pakhat chu Village leh Municipal Council a rorel tura thlantlin te thuneihna sang zawk pek a ni a. Assam, Mizoram leh Tripura Autonomous Council, Village leh Municipal Council inthlante State Election Commission kutah dah niin Village Council te chu hmasawnna hna thawk turin an mawhphurhna tihsan leh an ni a, Agriculture, Land Improvement, Implementation of Land Reforms, Minor Irrigation, Water Management, Animal Husbandry, Rural Electrification, small Scale Industries leh Social Forestry te a tel a ni.

Sixth Schedule hnuaia awm Meghalaya tiam lovin Assam, Mizoram, Tripura-ah te hian Village leh Municipal Council-ah hmeichhia te tan seat pathum (3) a pakhat hauh sak an ni dawn a, Autonomous Council hnuaiah hian hmeichhia te tan seat hnih tal hauh sak tur an ni bawk; hei hi hmeichhia te dinhmun chawisanna atana tih a ni a bawk.