Mizoram-a Rannung seh natna chungchang leh tunhnaia hri leng thar leh thlirhona neih a ni

Nimin khan Directorate of Health Services hnuaia Programme Officer-te chu Dr. F. Lallianhlira, Principal Director Office Chamber-ah \hukhawmin tunhnaia natna rawn hluar tak Scrub Typhus (Rannung seh) natna chungchang leh tunhnaia Thenzawl leh Buangpui khua a he natna hrileng chungchang a Health department hmalakna hrang hrang leh natna awmna hmun an zirchianna report an thlirho.

Nimin a he \hutkhawm hi Dr. F. Lallianhlira, Principal Director chuan a kaihruai a. Dr. Pachuau Lalmalsawma, SNO, IDSP chuan he natna chungchanga department-in hma a lo lak tawhna te leh Mizoram chhung hmun hrang hranga he natna thlen dan te, a invenna leh enkawlna bakah hmachhawp kal lai mek atana rawtna te powerpoint presentation hmangin a sawifiah a. Thusawitu dang Dr. H. Lalchungnunga, Director of Health Services chuan he natna thehdarhtu Tuhrik tihtlemna tura damdawi hmanga enchhinna tur pawh department in an neih thu a tarlang a, hei hi a \ul dan anga hman tura hmalakna kalpui mek a ni tih sawiin, he natna chungchanga hmalakna tur leh rawtna te sawihona hun an hmang bawk.

Rannung Seh natna tia hriat lar, Scrub Typhus natna hi IDSP, Directorate of Health Services in a chhinchhiah danin Mizoram-ah hian kum 2012 a\anga January 2019 thleng hian mi 3217 in an vei tawh a, mi 42 laiin nunna an chan phah tawh bawk a ni. He natna hrileng (outbreak) hi Mizoram-ah hian khaw 9 laiah alo thleng tawh a, Thenzawl-ah phei chuan hri leng hi vawihnih lai a thleng tawh bawk a ni.

He natna leng-ah hian Health Department chuan mipuite chi-ai lo turin a duh a, he natna vei nia inringhlelte chuan a rang thei ang bera damdawi lam thiamte rawn vat turin chah an ni a. He natna kawltu hi Sazu te an ni a, a thehdarhtu hi Tuhrik an ni a. Heng mahni invenna chi hrang hrang- ramhnuai kal dawna thawmhnaw phui, taksa khuh kim thei ang ber hak te, Odomos ointment leh rannung duh loh thil taksaa inchulhte, hnathawh zawha inbual fai a thawmhnaw suk fai te, phul hmunah leh leiah te thil phah loh chuan \hut mai mai loh te, chenna In leh a vel Sazu leh Tuhrik awm theihloh nana tihfai te hi mipuiten he natna laka kan inven nana kan tih tur a ni tih hria a, \ha taka zawm turin an chah bawk.