Mizoram State Assembly inthlanpui nei turin inbuatsaihna engkim peihfel a ni tawh

Tukin dar 7:00 a\anga member 40 awmna Mizoram State Assembly inthlanpui vote thlak turin inbuatsaihna engkim peihfel a ni tawh a, inthlanna buaipuitu zawng zawng pawhin an duty-na hmun \heuh an thleng kim tawh.
Inthlan hi Polling Station 1,164 leh Bru tan bika Tripura ramri a Kanhmun khuaa siam Polling Station siamchawp 15-ah te vote thlak a ni dawn a. Polling Station 47 chu Polling Station venhimna khirh zual bik a ngaih a ni a, 36 chu venhim ngai zuala ngaih a ni a, heng ah te hian venghimtu Police Silai keng dah tam bik a ni ang. Bial tinah Hmeichhe pual bik Polling Station pakhat zel dah a ni a. Heng Polling Station-ah te hian Presiding Officer pakhat leh Polling Officer 3 te chu hmeichhia vek an nih bakah venhimna lam hna thawktute pawh hmeichhia vek an ni ang a, hetiang hmeichhe pual bik Polling Station hi ‘Dingdi’ tia vuah a ni a. Mamit District-a Polling Station 7 chu ke a kal ngai a ni a, pahnih chu Lawng a kal ngai a ni thung a. Lawngtlai District-ah pawh Polling Station pakhat chu Lawng a kal ngai a ni.
Inthlanna atan hian venhimna khauh taka ruahman a ni a, a bik takin ramri hrulah te chuan venhimna uluk zual a ni a. Inthlan laia buaina siam tumte an lo luh theih lohna turin Mizoram leh \henawm State inkalpawhna zawng zawng khar vek a ni a, Myanmar leh Bangladesh ramri pawh khar vek a ni. Inthlan laia venhimna kengkawh tur hian State pawn a\angin Central Armed Police Force (CAPF) company 40 chahluh an ni a, chutih rual chuan State Police silai keng leh keng lo \hahnem tham tak an duty dawn bawk a ni.
Vawiin a inthlanna neih turah hian vote nei mi 7,70,395 te chuan inthlanna a in candidate 209 te chungchang an rel fel dawn a, inthlannaah hian rampum huap political party pathum, Tual\o party pathum leh Tual\o party inziaklut lo pahnihte’n an chuh a, Independent hrim hrim 2 an awm bawk. Rorellai Congress leh eptu party lian ber MNF chuan bial 40 an chuh kim ve ve a, BJP-in bial 39 chuhin ZPM chuan bial 38 an chuh a. PRISM leh Zoramthar bakah NCP leh NPP chuan candidate an nei ve bawk. Candidate zingah hian hmeichhia 15 an awm a, BJP in ngah berin 6 an nei a, Zoramthar-in 5 neiin an dawt a, MNF, PRISM leh NPP chuan hmeichhe candidate an nei lo thung.
Kumin State Assembly inthlan hi State pawn a\anga campaign a an lokal hraw ber leh tam ber \um a ni a, BJP tana campaign in Prime Minister, Narendra Modi, BJP President Amit Shah leh hruaitu dangte rawn kalin Congress tana campaign in AICC President, Rahul Gandhi pawh a rawn kal a, NPP tan Meghalay Chief Minister Conrad Sangma leh Minister dang te pawh an rawn kal bawk a ni.

Popular posts from this blog

PAN CARD an tih teh fo hi - Laldinpuia