Inthlanpui-a duty tur ten training neiin Vote an thlak

Assembly inthlanpui lo awm tura Serchhip District chhung Assembly bial pathum-a duty tur Presiding Officer (PRO) leh Assistant Presiding Officer (APRO) te tana Training vawi hnihna chu nimin khan neih a ni.
Serchhip District chhung Assembly bial pathum-a Assembly inthlanpui-a duty tur Presiding Officer (PRO) leh Assistant Presiding Officer (APRO) te tana training vawi hnihna hi Govt. Higher Secondary School, Ser-chhip-ah neih a ni a, he hunah hian Presiding Officer (PRO) leh Assistant Presiding Officer (APRO) ten inthlanpuia hna an thawh tur hrang hrang, Polling Officials te Form pawimawh fill-up dan te, inthlanna hmanrua (EVM & VVPAT) enkawl dan leh vawndan turte bakah Polling Official te hriattur thil pawimawh hrang hrang inhrilhhriatna neih a ni a. He huna tel Polling Official te hi hmun 5-ah zirtirna pek niin Election Master Trainer panga (5)- Vanlalhmachhuana, BDO Serchhip, Dorothy Muansangi, BDO E. Lung-dar leh C. Lalduhzuali, MCS, Settlement Officer, Serchhip, Ngurthansanga, SDC Serchhip leh H. Lalhruaitluanga, SDC Serchhip ten zirtirna an pe a ni.
Serchhip District chhunga Election-a duty tur Polling Party te hi Election Observer kaih-hruaina hnuaiah Second Randomization neihpui ni tawhin hetah hian Polling Party-a awm ho turte chu hriat theih a ni tawh a, nimin a training-ah pawh hian a huhova kal turte hi an inhre tawh bawk a, amaherawh chu an kalna tur Polling Station erawh a hranin la pawhfel leh tur a ni ang. 
Nimin vek khan he training-a tel te tan hian Postal Ballot-a Vote thlakna hun hawn nghal a ni a, an training-na hmunah hian Election Official te kalin Postal Ballot pechhuakin hmun-danga kengchhuak lovin a hmunah Vote thlak tir nghal zel an ni a. Vawiin hian Polling Official te tan hian a hmun ngaiah training hi nei lehin Vote pawh thlak leh theih a ni dawn a ni.

Popular posts from this blog

PAN CARD an tih teh fo hi - Laldinpuia