Tripura Refugee Camp-a Bru-te chu Mizoram-a Kanhmun-ah Vote thlak tir tum an ni

Mizoram Chief Electoral Officer (CEO) thar, Ashish Kundra, IAS chuan Bru voter-ten an vote thlakna turin ramri hnaih deuh Kanhmun khuaah Polling Station siam sak a nih a rin thu a sawi.
Ashish Kundra hian nimin khan Aizawl-a CEO Conference Hall-ah thuthar thehdarhtute kawmin, Tripura-a Bru-te Kanhmun-ah vote thlak tir an nih dawn thu hi a sawi a, “Polling Station zat tur leh Transportation turte chu Election Commission of India (ECI) a\anga instruction kan hmuh hunah kan buaipui ang," a ti a, Bru-te Kanhmun-a vote thlak tir hi NGO lam pawhin an hriatthiampuia a hriat thu a sawi bawk. CEO chuan inthlan atan hun a tlem tawh hle tih sawiin, "Mizoram-ah thil duhawm lo a thleng a, Mizo mipui zawng zawng lawm lohna a ni. Thil thleng tawhte theihnghilhin hma lam hun i thlir ang u. Inthlanna thiang hlim leh dik a awm \hin avangin Central Armed Police Force chahluh chungchang pawh Mizo mipuite ka hriatthiam pui che u. Mahse, ECI duhdan anga venhimna thilah chahluh an ngai a ni," a ti a. CEO thar chuan a thawhpuite leh amah chu ringtawk tura Mizo mipuite ngenin, "CEO hi min ring tawh rawh u. Officer \ha tak tak thawhpui ka nei a, inthlanna thianghlim leh felfai a awm theihna atan hian zanah nen hna kan thawk a ni. Mizoram-a inthlanna thianghlim leh felfai a awm \hin hi kan chhunzawm theih lohna tur ka hre lo,” a ti a, dan angin hna an thawh zel tur thu a sawi a. Kolasib DEO, Dr. Arun T-in Tripura Refugee Camp-a Bru-te Electoral Roll-a a thun luh chungchang sawiin, “Kolasib NGO-te'n an duh lova, Gauhati High Court-ah PIL an thehlut a, tunah chuan Court thuhnuaiah a awm tawh," a ti.
Ashsih Kundra chuan Mizo mipuite'n vote thlak vek se a duh thu sawiin, “Vote nei zawng zawngte vote thlak vek turin ka sawm a ni. NGO-te bakah Mizo mipui zawng zawngte inthlanna thianghlim leh felfai a awm theihna atan hian kan thawhpuiah kan ngai a ni," a ti a, Mizoram-ah inthlanna thianghlim leh felfai a awm theihna atan theihtawp an chhuah thu a sawi bawk.
CEO sawi danin, kumin inthlan atan hian \um danga tih ngai loh angin Photo Voters Slip sem a ni dawn a, inthlan hmain Booth Level Officer (BLO) ten voter-te hnenah an pe vek dawn a ni, \um dangah pawh Voters Slip hi sem \hin a ni a, mahse thlalak a chuang ngai lo thung. Kumin inthlan tur atan hian Polling Station 38 chu Vulnerable Polling Station atan puan a ni a, hengte hi ramri hnaih an ni deuh ber a. Polling Station 32 chu Critical Polling Station atan puan niin, hengte hi kum 2013 inthlana vote tlak \hatna leh candidate pakhat an vote hukna a ni deuh ber a ni. Polling Station 14-ah chuan web casting tih a ni bawk ang.

Popular posts from this blog

PAN CARD an tih teh fo hi - Laldinpuia