MZP Sub-Hqrs. Tlabung in Tlabung kawng siam hna thawktu Company laka FIR an thehlut

Mizo Zirlai Pawl (MZP) Sub-Hqrs. Tlabung chuan National Highway-302 thawm \ha mektu contractor pathum zinga pakhat, GP Project Ltd. lakah FIR an thehlut.

Tlabung leh Lunglei inkalpawhna kawngpui, National Highway-302 thawm\hatna atan GP Projects. Ltd-ten sum an sen tawh zat nia an sawi cheng nuai 480 leh an hnathawh dan inmil loa ni hriain, Tlabung MZP-te hian Anti-Corruption Bureau-ah thubuai an thehlut a, GP Project Ltd. ten sum an hman tawh zat an tarlan chungchangah thil felhlel a awm ngeia an hriat thu sawiin, thil awmdan chiang zawka chhuichhuak ngei turin an ngen a ni.

FIR thehluttu Tlabung MZP President, P. Vanlallawma chuan Tlabung leh Lunglei inkar NH-302 chu package 3-a \hen a nih thu leh, package tawp ber changtu GP Projects. Ltd-te chu hna thawk muang ber an nih thu an sawi a, heti chung hian tunhnaia RTI Act tlawhchhana an zawhna chhannaa GP Projects. Ltd. ten an hnathawh tur zaa 36 zo tawh anga an inchhal leh, tun thlengin kawng thawm\hat nan cheng nuai 480 chuang seng tawh nia an insawi chu tuna kawng dinhmun enin awih chi a nih loh thu an sawi a, mipui bum tum nana dawt sawiah puhin, an hnathawh viltu PWD Highway Division Lunglei te chu GP Projects. Ltd-te ngamlo ah an puh a ni.

Tlabung MZP tarlan danin, kumin December 21 hmain helai kawngpui siam hna hi contractor GP Projects. Ltd-te hian an thawk zo tur a nih laiin, tun dinhmunah lirtheia kal hleih theihlohna a la tam hle a, an thawh tur chin siam\hat nan Rs.18,16,65,519/- dah a ni a, PWD Highway Division-in hnathawh hi an vil a ni.