Mizoram-a Medical College hmasa ber tur MIMER chu Chief Minister in a hawng ta

Mizorama MBBS zirna In hmasa ber Mizoram Institute of Medical Education & Research (MIMER), Falkawn chu nimin khan Chief Minister, Lal Thanhawla chuan a hawng a. Chief Minister chuan MIMER hlawhtlinna atana thawktu zawng zawngte chungah lawmthu a sawi.

Nimin a Falkawn-a MIMER hawnna hunah hian Chief Minister, Lal Thanhawla chuan Mizoram in rahbi thar a kai tih sawiin, MIMER chu roreltu sawrkar ta bik ni lovin, Mizo mipui zawng zawng ta a ni, a ti a. Hmabak la tam viauin, tunah hian Medical College dinhmun chu duh angin la changtlung tawk rihlo mahse India rama College \ha ber siam tura bul\anna a nih thu a sawi a; 'Bul \an \hat hi a chanve zo ang a ni' an tih angin, chumi atan chuan Faculty member-te leh zirlaite an pawimawh thu a sawi a, \hahnemngaia theihtawp chhuah zel turin a chah bawk.
He hunah hian Khualzahawm Health Minister, Lal Thanzara chuan February 2014 khan Sawrkar laipui chuan ‘Establishment of New Medical Colleges with Existing District/Referral Hospitals’ tih project hnuaia, Hospital 58 zingah State Referral Hospital Falkawn chu Medical College dinna tur atan Mizoram chu pawmpuiin, he project hi an sanction tih a sawi a. Project cost hi cheng vbc. 210 a chhut niin, chumi a\ang chuan cheng vbc. 189 chu Ministry of Health & Family Welfare in thawhin chuta \ang chuan hmalak a nih thu a sawi bawk.
He hunah hian Khual Zahawm dang, Finance Minister, Lalsawta leh bialtu MLA, KS. Thanga te pawhin thu an sawi a. Chief Secretary Arvind Ray chuan MIMER hawnna hun hi kaihruaiin Lalrinliana Fanai, Commissioner & Secretary, H&FW chuan report a pe bawk.
Mizoram sawrkar chuan State chhunga Medical College a neih ve theih nan August ni 29, 2014 khan Ministry of Health & Family Welfare-ah dilna a thehlut a. MCI chuan 2017 January ni 5 leh ni 6 khan Inspection hmasa ber rawn neiin sawiselna engemaw zaht an nei a. Dilna hi thehluh leh nawn \hin niin, MIMER hi phalna pek a nih hma in Medical Council of India (MCI) chuan enfiahna, Inspection Visit neiin an lo kal thin a. MCI in enfiahna an neih hnuhnun ber chu April ni 4, 2018 khan niin, Ministry of Health and Family Welfare hnenah MIMER tan Letter of Permission pe turin May ni 15 khan rawtna an thlen a. MoHFW chuan MIMER-a MBBS zirlai 100 tan phalna, Letter of Permission (LoP) chu Academic Session 2018-19 atan May ni 25, 2018 khan a pe ta a ni.
MIMER hi College Wing leh Hospital Wing-ah \hen niin, College Wing-ah hian Academic Building, Administrative Office, Dept. of Biochemistry (5 practical laboratories), zirlai 50 lenna Demonstration Rooms, Faculty Room te leh 800 metre bial a zau Library te a awm a; Anatomy Building building chhungah - Faculty rooms, Demonstration room 2, Dissection Hall, Museum leh Histo-pathology laboratory leh Lecture theatres pahnih a awm a. Zirlai 100 te awmna tur Hostel Quarter Complex ah siam a ni bawk.
Hospital Wing-ah khum 250 awmin, Clinical Department hrang hrang a awm a. Central Laboratory ah Pathological, Biochemical leh Microbiological investigation a tih theih vek a. Khum 10 awmna Emergency Department & Casualty block, Major Operation Theatre 4 leh Minor OT 2, Endoscopy leh Bronchoscopy Unit, Dialysis Unit te awm bawkin ICU khum 20 awmna leh Blood Bank pawh siam mek a ni a. Radiology Department ah X-Ray khawl pali leh Ultrasound khawl 2 awmin, tunah hian khawl dang mamawh te lei mek a ni bawk.
MIMER-ah hian Teaching Staff-ah Professor 4, Associate Professor 4, Assistant Professor 31, Senior Resident 10, Demonstrator  14 leh Junior Resident 17 awmin Non-Teaching Staff pawh \hahnem tak an awm bawk.

Popular posts from this blog

PAN CARD an tih teh fo hi - Laldinpuia