Bru hruaikir turin inpeih thawkhat tawh

Tripura Relief Camp 6-a awm Bru chhungkaw 5,400 chuangte tun thla ni 14 a\anga lakletna tur ruahmanna chu peihfel thawkhat a ni tawh.
Home department hotute hnen sawi danin chhungkaw 5,407 a mihring 32,876 te hruaikirna tur ruahmanna hi sum awmsa hmangin kalpui chhoh zel a ni tawh a. Mamit, Kolasib leh Lunglei District-a an khaw hlui \heuh a an inbenbelna tur leh an lokir laia lo hmuah dan turte ruahmanin District Core Committee on Bru repatriation te chu an \hukhawm kim vek tawh a. Ruahmanna kimchang siam chhoh zel a ni. Mamit District-ah chuan chhungkaw 4,199 inbenbel tir tum a ni a, Kolasib District-ah chhungkaw 824 leh Lunglei District-ah chhungkaw 384 te dah an ni ang. Bru chhungkua te hi Naisingpara, Asapara, Khakchangpara, Hamsapara, Hazacherra leh Kaskau relief camp-ah te an awm a. Kum 1997 a an pem thlak hma a an awmna a dah let leh tur an nih avangin relief camp pakhata awmte pawh district hrang hrangah dah an ni dawn a ni.
Ruahman dan chuan Mizoram -aan lo luh hnuah an awm lailawkna turah awm phawtin an dinhmun enfiah a ni ang a. Mamit District-a khaw 48, Kolasib District-a khaw 10-ah leh Lunglei District-a khaw 4-ah inbenbel tir an ni ang.
Hetih lai hian North Tripura District a Relief Camp paruka awm Bru hote hi sawrkar ruahman ang hian Mizorama an kir duh an rin loh thu Relief Camp-a Bru ho insuihkhawmna pawl lian ber, Mizoram Bru Displaced People’s Forum (MBDPF) hotute chuan an sawi a. Mizorama an kir lehna tura Union Home Minister, Rajnath Singh hova Mizoram leh Tripura Chief Minister te leh MBDPF President, A. Sawibunga te’n July thla bula Delhi a inremna an lo ziah tawh a\angin mipui nawrluihna avangin A. Sawibunga hi a inhnukdawk tawh a ni.
Relief Camp a awm Bru \henkhat hian Bru te tana Special Development Project pek tawh a taka kalpui a nih theihna tur te, Bru lo kir te chu In 500 aia tlemlo khaw khata dah tur te, an pawisa dawn tur \um khata dawn te an ngiat a. Hemi avang hian sawrkar laipui ruahmanna a inremna siam a\anga inhnukdawk turin MBDPF hruaitute chu an kar ta a, an kar nat em avangin heta hming ziaktu MBDPF hruaitu chuan inremna atana a inhnuhdawh thu ziaka dahin a thawn a ni.
Bru hote hi October ni 21, 1997-a Dampa Tiger Reserve huam chhunga Forest Guard hnathawk lai, Lalzawmliana Bru hel hovin an thah hnu lawk khan Tripura-ah a hlawpin an pem a. November ni 16, 2009 a\anga laklet leh tuma ruahman laiin Bung\huam tlangval Zarzokima chu Bru helhovin an kaphlum leh a, an lokir lo mai ni lovin engemaw zat an pem belh leh a ni. 

Popular posts from this blog

PAN CARD an tih teh fo hi - Laldinpuia