MiMIR inhrilhfiahna nei

Nimin khan NEDP hnuaia Project duan 'My Project, My NEDP - Mipui Mamawh In\awm Ruahmanna (MiMIR)' inelna chungchang inhrilh-fiahna hun chu Serchhip DC Conference Hall-ah neih a ni.

He hun hi Serchhip District Addl. DC, Chuauhnuna chuan hmanpuiin he Project inelna hi thluak inelna a ni a, \hahnem ngai taka mahni khawtlang tana ro tling tur ngaihtuah chhuah tum turin kankhawmte a chah a. Hriatreng tlak thil \ha, khawtlang hmangaihna lanchhuah tirna hun remchang tak a ni, a ti bawk.

He hunah hian Neng Thianlal, DLAO Serchhip chuan Project \ha tak siam dan tur zirtirna a pe a, khawtina Village Council te kaihhruaina hnuaiah tlawmngai pawl 3 – YMA, MUP leh MHIP a\angin mi 2 \heuh te nen Joint Committee siam tur a ni a. Chu Joint Committee sawihona a\ang chuan MiMIR Project Concept Paper hi siam tura tih a ni a. Mimal a\angin Project hi dawn theih ani dawn lova, mi \hahnemngai ten project an neih chuan an khaw Joint Committee hnenah thlen zawk tur a ni ang. Joint Committee chuan MiMIR ruahmanna chu Form (Proposal Paper) siamsa hmangin July 16, 2018 aia tlai lovah Member Secretary, SDO (S) hnenah thehluh tur a ni. 

Heng project hrang hrang thehluh a\ang hian District MiMIR Committee chuan a \ha zual 20 an lo thlangchhuak anga, an project sawifiahna neih tir leh an ni ang a, chuta \ang chuan thlifim lehin Project \ha ber hi thlanchhuah a ni dawn a ni. Chumi hnuah lawmman dawngtu khua chu an Project in a kaihhnawih sawrkar department ten Detail Project Report mumal zawk an siam sak leh ang a, hnathawhna tur cheng Nuai 100 an dawng tawh dawn a ni.

Nimin a he inhrilhfiahna hun hi R. Vanreng-puia, SDO (S), Member Secretary, District MiMIR Committee chuan a kaihruai a, MiMIR project inelna a\anga District chhunga khua leh veng tina Joint Committee aiawh mi 2 \heuhte an tel a a ni.