Zokhawsang-a insawn tur Assam Rifles ten thilphut an nei tam telh telh - Home Minister

Home Minister, R. Lalzirliana chuan Zokhawsang-a insawn tur Assam Rifles te chuan thilphut an nei tam leh telh telh tih sawiin, hemi vang hian Revenue department nen pawh anla inrem hlei theilo ni a a hriat thu a sawi a, hei hi Mizoram sawrkar nen pawh MoU an la ziah theih lohna chhan pakhat a nih thu a sawi.

Nimin-a Assembly Session zawhna leh chhanna hunah Tuikum bialtu MLA, Er. Lalrinawma zawhna leh zawhbelhna te chhangin Home Minister R. Lalzirliana chuan, Assam Rifles Complex, Zokhawsang ami chu sak zawh ala nih loh thu leh, state sawrkar sak a nih loh avangin physical achievement pek theih a nih loh thu a sawi a, state sawrkar khawih a nih loh avangin sum ruahman le hsen ral tawh zat pawh report pek theih a nih loh thu a sawi. Tunah hian state sawrkar leh Assam Rifles te MoU sign tur buaipui mek a nih thu Home Minister chuan sawiin, MoU sign fel a nih hunah leh EPIL in a sak hna an thawh zawh hunah insawnchhuah theih a nih tur thu a sawi.

Home Minister, R. Lalzirliana chuan Assam Rifles Complex, Zokhawsang-a Assam Rifles te an insawnna turin MoU ziah a ngai tih sawiin, chu chu tuna an la insawn lohna chhan niin a sawi a. Assam Rifles te hian thilphut an nei tam leh tulh tulh tih sawi bawkin, tuna an awm mekna chhunga Mandir an neih te bakah an hmun pawimawh dangte chu claim an neih zingah a tel tih a sawi a, hei vang hian Revenue Department nen pawh an la inrem hlei theilo nia a hriat thu a sawi.

Tuna Assam Rifles awm mekna Aizawl khawpui laili a\ang hian Assam Rifles te hi chhuak se tih chu kan duh tlan vek a nih thu pawh Home Minister chuan sawiin, Mizoram sawrkarin hmalakna tur a neih chin ah hmalak a nih thu a sawi a, Assam Rifles Complex, Zokhawsang-a Electric eng pek hna chu kum 2011 khan zawhfel a nih tawh thu leh PHE lamin tui pekna atan tun dinhmunah cheng nuai 41.81 leh PWD in kawngpui siamna tur atan cheng nuai 54.40 anla mamawh thu a sawi bawk. 

Assam Rifles lamin thilphut an neih belh chungchangah hian Revenue Department lam pawhin Committee an siam tih Revenue Minister, R. Romawia pawhin sawiin, Committee pawh vawi 2/3 an \hutkhawm tawh thu a sawi a. "Assam Rifles lam hian thil an chingpawr thar zel a, hemi vang hian thu mumal tak pawh neih a harsa a, Revenue department chuan theihtawp a chhuah mek a ni," a ti bawk.