Kum 2015-2018 chhungin Police thi 435 awm

Home Minister R. Lalzirliana chuan kum 2015-2018 chhunga Police thi zat chu mi 435 a an nih thu House hrilhin, heng mite hi Zu vanga thi an ni tih tihchianna a awm loh thu a sawi.

Nimin-a Assembly Budget Session zawhna leh chhanna huna MNF Member, Dr. K. Beichhua zawhna leh member dangte zawhbelhna chhanga he thu hi sawiin Home Minister chuan, tunhnai 2015-2018 chhunga Police thi te hi natna chi hrang hrang, Cancer, Heart attack, Mitliam leh a dangte vanga thi an nih thu a sawi a, Zu vanga thi an ni tih finfiahna a awm loh thu a sawi a, a hriatchian theih mai chinah hemi kum chhung hian ral kut-a thi Police 3 an awm thu a sawi.

Home Minister chuan tun dinhmunah Police hnaruak Mizoram sawrkarin a neih zat chu 2428 a nih thu sawi bawkin, heng hnaruak te hi hnawhkhah mek an nih thu leh tunah pawh hian MPSC in ASI leh SI an la dawn mek ni a a hriat thu a sawi a. Member te zawhbelhna chhangin Home Miniter chuan Mizoram chhungah Hel training na hranpa a awm an hriat loh thu sawiin, hetihlai hian HPC(D) te pawh inremna siampui mek zel an nih thu a sawi a, thla thar ah chuan HPC(D) te nen MoU ziah fel theih beisei a nih thu a sawi bawk.