Latest News

Tourism Minister in Rural Homestay Scheme hawng

Mizoram sawrkar Tourism Department hmalakna a Champhai District-a Rural Homestay Scheme kalpui tur chu niminpiah tlai khan Tourism Minister, John Rotluangliana chuan a hawng.
Rural Homestay Scheme hawnna hunah hian Tourism Minister chuan Champhai District-a Rural Homestay Scheme buatsaih chu Mizoram-a a vawikhatna a ni tiin hetiang hmalakna neih a ni chu lawmawm a tih thu a sawi a. Homestay Partner-te (thlenna tur in neitute) hnenah chuan ‘Kan ram leh hnam dar-thlalang in ni’ tiin ‘Nangmahni ah khualzinten min hmuhdan a innghat a ni,’ a ti. Minister chuan khawchhak lamah pipute sulhnu tam tak khualzinte hip thei tur a awm thu sawiin, hei vang hian Rural Homestay Scheme atan pawh Champhai District thlan hmasak a ni, a ti a. In neitute hnenah chuan hnamdang mikhualte rilru zau tak pu chunga chhawn thiam a pawimawh thu a sawi bawk.
Rural Homestay Scheme hi zin veivakte tana Mizote nunzia a taka hriat theihna tura ruahman a ni a. NEDP 2016-2017 hnuaia Tourism Department hmalakna niin Champhai District-a khaw paruk- Chawngtlai (7), Dungtlang (5), Vangchhia (5),Vaphai (5), Hnahlan (6) leh Zokhaw-thar (7)-ah te hian chhungkaw 35 chu Homestay Partner atan thlan an ni a. Heng chhungkaw thlante hian an In-ah mikhual te man chawia an thlenna tur room changtlung tak an siam a. Ei leh in tur pawh an thlenna ten an lo siam sak a nih loh pawhin anmahnia inbawl chawpna tur a awm dawn a ni. Chhungkaw tinte hi cheng nuai 2.29 \heuh scheme atan hian pek an ni a. Foreign, Domestic leh Local Tourist ten Zokhaw nunphung leh hnathawh dante an tem ve theihna a ni a, hna leh thildang vanga zin nikhua pawha thlen theihna tur a ni bawk. Homestay partnerte hi Homestay nihphung leh kalphung, enkawl dan tur leh mikhual lo chhawn dan tur training pek an ni.
Khaw paruk thlanchhuah ah te hian pipute sulhnu hlui en tur leh hmuh tur hrang hrang a awm a, Homestay partner-te hi Tour Guide an ni nghal thei dawn a ni. Homestay hi Category A leh B a \hen niin thlen man mumal taka duan a ni a, Category A-ah hian zan khatah mi pakhat tan cheng 300 niin Category B-ah hian mi pakhat tan cheng 200 a ni a. Scheme hlawhtlinna tur hian Tourism Department chuan Implementing Committee dinin Champhai DC chu chairman niin Tourism Department Director chu Member Secretary a ni.

Comments

Popular News (Last 30 Days)