Assembly Budget Session neih mekah sawrkar kumthar-a Mizoram Budget tur cheng vbc. 9672.65 pharh a ni

Mizoram Asssembly Budget Session neih mekah Finance Minister, Lalsawta'n nimiin khan kum 2018-2019 chhunga Mizoram sawrkar sum hman tur ruahman a pharh a. Hetah hian nakum sorkar kum 2018-2019 chhunga sawrkar sum hmuh zat tura beisei chu a pumpuiin Rs. 96,72,65,00,000/- a ni a, heta \anga sum hmanral tur ruahman zawng zawng chu Rs.94,92,38,00,000/- a ni.

Nimin a Assembly \hutkhawm Speaker, Hiphei kaihhruai a neih ah hian inkhawm \an a nih veleh thildang ti lovin Speaker chuan Finance Minister, Lalsawta chu kumthar 2018-2019 atana Mizoram Budget pharh turin a sawm nghal a, Speaker chuan kumthar atan Mizoram Budget cheng vbc. 9672.65 chu House-ah hian a pharh a. Kum 2018-19 budget hi kum 2017-18 budget vbc. 8803.10 aiin vbc. 106.33 in a tam zawk a ni. Budget thar ah hian sum hmuhna tur lamah State's Own Tax Revenues-ah cheng vbc. 483.34; State's Own Non-Tax Revenues-ah cheng vbc. 323.85; Devolution of Central Tax & Duties-ah cheng vbc. 3625.32 leh sawrkar laipui-a Grants-in-Aid a\angin cheng vbc. 4476.92, a vaiin cheng vbc. 8909.43 hmu tura beisei a ni a. Heng bakah hian Sawrkar sum puk tur, Public Debt a\angin cheng vbc. 727.75 leh Loans & Advances (Recoveries) a\angin cheng vbc. 35.47, a vaiin cheng vbc. 763.22 hmuh beisei a ni bawk a, heng sum hmuh tur zawng zawng beisei hi cheng vbc. 9672.65 a ni.

July ni 1, 2017 a\anga GST hman a nih tak avangin VAT hnuaia Tax lak \hin chi hrang hrang te chu GST hnuaiah chhunluh a ni a. Finance Ministry chhut dan chuan Central leh State sawrkar in chhiah a\anga an lakluhin beisei a phalo rih a, hun lo la kal zel turah erawh chuan a \hat chhoh ngei beisei a ni.

New Economic Development Policy (NEDP) kalpui mek chu chhunzawm zel a ni dawn a, kumin hian cheng vbc. 750.00 dah niin, kum 2018-19 atan cheng vbc. 1000 dah a ni a. Hemi hnuaiah hian kawng chhia avanga mipui ten harsatna an tawh sutkianna turin PWD hnuaiah cheng vbc. 100 chu Improvement of roads atan bik dah a ni. Heng bakah hian Mizoram Institute of Medical Education & Research (MIMER) atan te, Lunglei Circuit House sak \hat nan te, Champhai Zotlang a Truck Terminal sakna tur atan leh Department hrang hrang hnuaia hmalakna turin NEDP hnuaiah hian sum dah a ni bawk.

Sawrkar programme pawimawh tak, NLUP kalpui mekah kum 2018-19 chhung hian cheng vbc. 80 dah a ni bawk a. Mamawh dan a zira tihpun theih tura ruahmanna siam theih beisei a ni. Hei bakah hian programme pawi-mawh zual heng - NLCPR, NEA, NABARD, NCDC, Mizoram State Roads-II, Regional Transport Connectivity Project (MSR-II RTCP), Upgradation of Serchhip to Buarpui road te, NERCCDIP te leh CSS sum dona State Matching Share atan sum dah a ni bawk.

Budget thar ah hian kum danga la tih ngai loh, Sports lama mi hming\ha leh chawimawi tlak te chawimawi nan leh \anpuina turin cheng nuai 30 chu Budget Head hranpa siamin dah a ni a. Home Department hnuaia Silai leh a mu leina turin Budget Head hranpa siamin cheng vbc. 1 dah a nih bakah State Road Fund siam thar a ni a, kum thar atan cheng vbc. 50 dah a ni bawk a. IFAD nena thawhdunna hnuaia District pali - Champhai, Kolasib, Serchhip leh Mamit-a FOCUS kalpuina turin cheng vbc. 13 dah a ni bawk.

Finance Minister chuan kum 2018-2019 chhunga Mizoram sawrkar leiba tlingkhawm tura chhut zat chu Rs.78,87,04,00,000/- niin a sawi a, sawrkar leiba hi pung chho zel mahsela, State GDP a\anga chhut chuan Mizoram dinhmun a ziaawm chho zel niin a sawi a, kum 2013-2014-a leiba GDP nena chhut kawpa za zela 54.46 tling chu kumin sawrkar kum tawpah chuan za zela 40.87-ah a tlahniam thei niin a sawi a ni.