Thursday, 15 March 2018

Naupang ruk tum-a puh man

New Serchhip Bazar Veng-a cheng mipa naupang pakhat chuan tunkar Thawh\anni khan hnamdang pakhat in ruk tumin a man nia sawiin, Serchhip Police-ah FIR thehluh a ni a. Hetianga naupang ruk tum nia puh hi Serchhip Police te chuan manin Serchhip District Jail-ah dahluh nghal a ni.
Serchhip Police te hnen a\anga thu kan dawn danin tunkar Thawh\anni tlai dar 4:00 vel khan New Serchhip Bazar Veng-a naupang pakhat, kum 6 mi chuan an Veng-a hnamdang awm pakhat chuan manin Buara bag-a khung a tum laiin a tlanchhuak hman niin a sawi a, hemi chungchang hi a chhungte a hrilh hnuah Thawhlehni khan Serchhip Police te hnenah report thehluh a ni.
He naupang in a sawi dan chuan Ser-chhip Boxing Hall bula an awm lai chu hnamdang pakhat hian lo manin Buara-ah khung a tum a, amaherawh chu a tlanchhuak hman a, he mi hian Chemte pawh a keng nia sawiin, amah hi a hriat mi a nih thu a sawi bawk a. Hemi chungchang ah hian Serchhip Police te chuan ngawrh taka hma la nghalin niminpiah tlai khan naupang ruk tumtu nia puh, Joyanul Hoque Tapadar (Janula tiin an koh), Patharkandi, Karimghanj, Assam; tuna Cement Mistiri hna thawka New Serchhip Venglai-a khawsa mek chu manin hemi zan vek hian Serchhip District jail-ah dahluh nghal a ni.
He thil thleng chungchangah hian New Serchhip Bazar Branch YMA chuan thuchhuah siam nghalin hetianga hnamdang in kan khawlaia timna leh zahpah nei miah lova naupang an khawih ngam leh rukbo hial tuma an khawsa ngam chu mak an tih thu leh a rapthlak an tih thu sawiin, hnam inhmusitna leh thamlohna ah ngaiin an dem thu an sawi a. Tun hnuah hetiang thil hi thleng tawhlo se an duh thu sawiin, he pawikhawihtu hi tunhnuah an Vengchhung ah awm an rem tih tawhloh thu leh a phu tawk hremna pek ngei an phut thu an sawi a. Tun thla ni 18 thlengin New Serchhip Bazar Veng huamchhungah Vai pawnchhuah khap a nih thu pawh an tarlang bawk.

Latest News

PRISM Party in Counter Affidavit an file thu an sawi

PRISM Party chuan MLA inthlana din tuma Nomination File mi 28 lakah Counter Affidavit File a nih thu an sawi.