Bairabi Zophai ah Zofate Chawlhbuk sak ngei tum a nih thu Home Minister in House-ah a sawi

Home Minister R. Lalzirliana chuan engtik Ni-ah emaw chuan Bairabi Zophai-ah Zofate Chawlhbuk sak ngei tum a nih thu House hrilhin, Assam sawrkar leh Assam Police te chet dan chu Mizoram sawrkarin a dem thu a sawi.
Nimin-a Assembly Budget Session zawhna leh chhanna neih zawh hnu a Aizawl West-II bialtu MLA, Lalruatkima'n Bairabi Zophai-a buaina thleng mek chungchang 'Speical Mention' a neih a zawhna a neih te leh sawifiah ngai awmte sawifiah turin Speaker Hiphei-a’n Home Minister R. Lalzirliana a sawm a. Home Minister chuan, MZP ten Bairabi Zophai-a Zofate Chawlhbuk sak an tum chungchanga MZP hruaitute a biak dan House hrilhin, Chawlhbuk sak a nih thu leh \hiah a nih hnu a Assam Police ten Duty Post an rawn sak pawh MZP ni a hriat ten an \hiah leh nghal thu a sawi.
Heng thil thlen hnu March ni 10-a Zofate Chawlhbuk sak tum MZP te leh anmahni thlawptute laka Assam sawrkar leh Assam Police te chet dan chu Mizoram sawrkar in a dem tak zet tih sawiin, dan ah chuan Police te khan Tear Gas leh Aurinna te an hmasa tur a ni tih a sawi a, "Zirlaite kutthlak tura thu petu Assam sawrkar leh Assam Police te kan dem em em a, hetiang anga an che hi kan lung a awilo em em a ni," a ti bawk.
Home Minister chuan, Mizoram sawrkar a lungawiloh avangin Mizoram Chief Minister in Union Home Minister-ah lehkha a thawn nghal tih House hrilhin, Chief Minister lehkhathawn ang hian Union Home Minister chuan tun thla March 20-a Mizoram Chief Secretary leh Assam Chief Secretary te New Delhi a inbe turin ruahmanna a rawn siam tih House a hrilh a, Chief Minister ve ve pawh a \ul dan azira inbiak remtihsak an nih thu a sawi bawk.
Home Minister chuan nimin a MZP ten Zofate Chawlhbuk sak an tum an \hulh chu lawmawm a tih thu leh ropui a tih thu sawiin, Chief Minister remtihna a Congress Legislature Party (CLP) thuchhuak angin, engtikni-ah emaw chuan Bairabi-ah Zofate Chawlhbuk sak ngei ala nih tur thu a sawi a, hemi atan hian hmalakna pawh a kal mek thu a sawi.
Hetihlai hian Aizawl leh Kolasib DC ten Cr.PC 144 an lo puang chu an tih tur nilo-a a ngaih thu pawh sawiin, Cr.PC puan chungchang chu Home Minister a nih anga rawn ni ve tura a ngaih thu leh hetianga thil an ti a nih chuan inzahlohna nasa tak a nih thu a sawi bawk.

Latest News

Minority Scholarship chungchanga hriattur te

Minority Scholarship chungchanga hriattur te - Laldinpuia

Popular News