Kawlphetha intodelh tura hmalaknaah State Solar Policy mumal tak siam a ni tawh - Chief Minister

Chief Minister, Lal Thanhawla chuan kawlphetha intodelh tura hmalakna ah State Solar Policy mumal tak siam a ni tawh tih Congress member, RL. Pianmawia zawhna chhangin House a hrilh.

Nimin a Assembly inkhawm ah Congress Member, RL. Pianmawia zawhna chhangin Chief Minister, Lal Thanhawla chuan Kawlphethaa intodelh chu Sawrkar laipui pawhin a ngaih pawimawh thu leh New and Renewable Energy hmang \angkai tura a duh angin nizung chakna hmanga kawlphetha siam chu damdawi In hrang hrangah hmang tura \anlak mek a nih thu a sawi a. Chief Minister chuan, tunah hian nizung chakna hmangin Vankal daiah kawlphetha megawatt 210 pechhuak thei tur leh Tlungvel-ah megawatt 2 pechhuak theih tur buaipui mek a nih thu leh tunhnai deuha Kolkata-a Mizoram Sawrkar-in Magnetic Roadshow a buatsaihah Company pakhat chuan nizung chakna hmanga kawlphetha megawatt 100 chuang pechhuak thei tur Mizoram-a din an inhuam thu an hrilh tih a sawi bawk.

Hei bakah hian Secretariat Administration Department enkawltu, Chief Minister Lal Thanhawla chuan, New Secretariat Building-a Sorlar vuah chu zawh a nih tawh thu leh \angkai taka hman mek a nih thu RL. Pianmawia zawhna chhangin a sawi bawk a. Hemi zawhna kal zela zawhna neitu, RL. Pianmawia'n Secretariat building hluia Sorlar vuah a nih ve theih leh theih loh te, MNF member, Lalrinawma'n New Secretariat Building-a Sorlar vuah hnathawktute leh a senso zat te, lo chhe palh ta se tunge enkawltu tur tih leh Lalruatkima'n New Secretariat Building-a Sorlar vuah chu tunah hian hmantlak a ni reng em tih leh New Secretariat huamchhunga tunhnaia hmeithai pakhat dawrte \hiah tak chu enge a chhan tih an zawhbelhna chu Chief Minister hian a chhang duh lo a ni.

Mizoram Legislative Assembly \hutkhawm neih mek hi Vawiin, Inrinni leh naktuk Pathianni te chawlhsan a ni ang a, karleh Thawh\anni-ah inkhawm chhunzawm lehin hetah hian hun hmasa ah zawhna leh chhanna lak a ni anga, chumi hnuah kumin sorkar kum, 2017-2018 chhunga sum indaihlohna phuhrukna tura Finance Minister in a pharh tak, Supplementary Demand Rs. 22,86,35,61,000/-chu sawihova pass tum a ni ang a, hemi hnu hian nakum sawrkar kum atana budget ruahman a tlangpuia sawihona \an a ni ang.