Mizoram Olympic Association (MOA) buatsaihin nimin khan Aizawl-ah ‘International Olympic Day 2026’ pualin Olympic Day Run leh Plantation Drive neih a ni.
Mara Autonomous District Council (MADC)-a Local Administration Department (LAD) chuan nimin khan an huamchhunga Village Council 71 hnenah Siaha-ah RGSA Scheme kaltlangin Computer Set an sem a, hemi puala MADC Golden Jubilee Hall-a hun hman ah MADC CEM M. Laikaw leh Bawrhsap VL. Hruaizela Khiangte bakah MADC-a LAD changtu EM K. Chhuabei ten thu an sawi a ni. Rashtriya Gram Swaraj Abhiyan (RGSA) hi Ministry of Panchayati Raj, Govt. of India hnuaia kalpui niin VC te thuamchak a, training pek a, hmasawnna ruhrel tha zawk siam chu a tum a ni.
Chakma Autonomous District Council (CA-DC)-ah BJP leh ZPM te chuan sawrkar siam turin thawhdunna an siam a, CADC CEM hlui Durjya Dhan Chakma leh CADC District BJP President kaihhruaiin Chakma Democratic Alliance Legislature Party chu nimin khan din a ni. He Legislature Party-ah hian Leader atan BJP atanga MDC Nirupam Chakma bakah Deputy Leader-ah Kali Kumar Tongchangya (ZPM), Treasurer-ah Molin Kumar Chakma (BJP) leh Secretary-ah Supreme Raj Chakma (ZPM) te an awm a, Legislature Party hian Kamalanagar Constituency atanga MDC ni mek Nirupam Chakma chu sawrkar siam turin thuneihna an pe a, nimin khan Governor hnenah sawrkar a siam theih thu hi a thlen nghal a ni.