Olympic Day Run leh Plantation Drive neih a ni

Mizoram Olympic Association (MOA) buatsaihin nimin khan Aizawl-ah ‘International Olympic Day 2026’ pualin Olympic Day Run leh Plantation Drive neih a ni.

Olympic Day Run hi Aizawl Chanmari kawn, Dinthar leh Sikulpuikawn atanga tanin Lammual panin tlan a ni a, Infiamna pawl chi hrang hrang 15 chuang atangin mi 631 an inlan a, Lammual-ah hian intawkkhawmin Environment Forest & Climate Change Department MinisterLalthansanga hovin hun hman a ni. EF&CC Minister chuan Olympic Day puala thingphun ngaih pawimawh a ni chu lawmawm a tih thu sawiin, Environment thatna State chu State hausa an nih thu a sawi a, he huna kalkhawmte chu thingphun leh ramngaw humhalh ngai pawimawh deuh deuh turin a chah nghal bawk. Hei bakah hian Infiammi kalkhawmte hnenah inzahtawnna te, hun vawn dik te, mahni inthunnunna te leh dawhtheihna te ngaih pawimawh a tul thu sawiin, infiamna chu huatna ni lova in unauna tha zawk infiammite inkara thlen theitu ni ngei se a duh thu a sawi bawk.

Olympic Day lawmna hi Mizoram Olympic Association President Robert Romawia Royte chuan kaihruaiin khual zahawm Sports and Youth Services Minister Lalnghinglova Hmar pawhin Olympic Day puala Olympic Day Run hman a ni thin chu tha a tih thu sawiin, Mizoram chu a hminga Olympic Day lo zawm ve tu mai ni lo a, Olympic-ah ngei Mizo infiammi tam zawk kan la tel ve ngei a beisei tlat thu a sawi bawk.

He hunah hian MOA Secretary General V. Lalzawmliana hnen atangin report ngaihthlak a ni a, MOA Senior Vice President F. Lalnienga’n lawmthu sawina in hun a khar a. Olympic Day Run-a pawl tlan tam te hnenah lawmman sem niin Mizoram Table Tennis Association chu pakhatna niin Rs. 10,000 hlan an ni a, Mizoram Football Association leh Mizoram Wrestling Association ten lawmman pahnihna Rs. 5000 dawngin Hockey Mizoram leh Mizoram Amateur Taekwondo Association ten lawmman pathumna Rs. 4000 an la bawk a ni.

Lawmman pawisafai an sem rual hian thingtiak hlan tel nghal zel an ni a. Lammual-a hun hman zawh hnu hian Muallungthu-a Mizoram State Sports Council Ground-ah thingtiak phunna hun hman chhunzawm nghal a ni bawk.