Mizoram-a Local Fruit Beer siam turin mi 12 thlanfel an ni tawh

Mizoram Liquor (Prohibition) Amendment Act, 2025 hnuaia Local Fruit Beer siam tur (manufacturer) atan mi 12 thlan fel an ni tawh a; phalna neia Local Fruit Beer siamchhuahte hi Distributor atana thlante chauhin an zuar thei dawn a, Distributor ni lo tan Local Fruit Beer hi zawrh chhuah phal a ni tawh dawn lo.
Excise & Narcotics Department hotute chuan Akashvani News Aizawl zawha chhangin, Mizoram Liquor (Prohibition) Amendment Act, 2025 hnuaia Local Fruit Beer siam phalna diltu mi engemawzat zingah mi 12-in endikna an paltlang tawh thu leh dilna endik mek engemaw zat ala awm thu an sawi a; Vawiin hian an pualin Training buatsaih a ni dawn a, inkaihhruaina, Standard Operating Procedure (SOP) te, FSSAI inkaihhruaina hnuaia thianghlim taka sawngbawl dan tur te, Beer an siamte mawihnai taka zawrhchhuah tura sawngbawl dan tur leh Mizoram Liquor (Prohibition) Amendment Act, 2025 hnuaia Dan zawm tur leh Chhiah chawi tur chungchangte inhrilhfiah a ni ang, an ti.

Excise & Narcotics Department hotute chuan Local Fruit Beer hi a siamchhuaktu ten direct-a an hralh nghal phal a nih dawn loh thu an sawi a, Training zawh hnuah hian Dan hnuaiah Local Fruit Beer an siam anga, Distributor-te peihfel an nih veleh zawrhchhuah a ni ang tih an sawi a; tuna Licence nei lova lo inphochhuak leh zuarte chu man theih an nih tawh dawn thu an sawi bawk a ni.

Mizoram-a Zu khapna Dan siam dang-lamna, Mizoram Liquor (Prohibition) Amendment Act, 2025 Section 45D(1)-in a tarlan danin, Local Fruit Beer hi Mizoram-a tharchhuah thlai/thei chi hrang hrang - Sawhthing, Balhla, Chawngthei (Dragon Fruit), Sapthei, Lakhuih-thei, Sunhlu, Káwlthei, Theiheráwt, Fú, Làmkhuang, Dawnfawh, Hmazil leh a dangte hmanga siam tur a ni a; Mizorama thar hmang chauh hian Fruit Beer hi siam theih a ni a, licence hi thlai leh thei chikhat atan pek tur niin, thei leh thlai chi khat aia tam siam duh tan licence hran dil leh a ngai a ni.