Khualzin thlenna tur inziaklut 262 awm tawh
Inrinni kaltaa Aijal Club-a Vanglaini chanchinbuin 'Mizoram-ah khualzin - A hlawkna leh invenna tur' tih thupui hmanga ‘Zoram Titi’ an buatsaihah Tourism Department hotute chuan tun dinhmunah Mizoram-ah khualzinte thlenna tur Homestay 107, Hotel 94, Guest House/ Lodge/ Inn 61, Resort 11, Farmstay 3 leh Restaurant 1,024, an inziahluh tawh thu an sawi a. Hei bakah hian khualzinte kaihruaitu tur Tour Guide 125, Tour Operator 23 leh Travel Agents 46 chu sawrkar-ah an inziaklut a, Catering Unit 45 leh Picnic Spot pathum pawh sawrkarah an inziaklut tawh tih an tarlang a. Sawrkar kum kal mekah September thla thleng khan khualzin mi 4,36,988 chhinchhiah an ni tawh a; heng zinga mi 4,29,980 chu India mi (domestic tourist) an ni a, a bak mi 7,008 chu ram pawn mi (Foreign tourist) an ni tih an tarlang bawk.
Chief Minister Lalduhoma chuan tunhnaia hmun hrang hranga thu a sawina-ah Mizoramah zan khatah mikhual 3,200 vel bak riahna tur a awm loh thu a sawi a. Khualzin pung zel chu khualzin thlenna tur ten an dawl zo lo lam a nih thu leh Thlasik lo thleng turah Mizoram-ah khualzin an pun nasat zual dawn avangin Tourism lama eizawnna leh sumdawnna kalpui chu hmalakna tha tak a nih thu a lo sawi tawh a ni.