Thenzawl Vengthar VC by-election neih tur tih khawtlai a ni - MNF
Thenzawl Vengthar Village Council by-election neih tura hriattirna tihchhuah chu High Court in kaltlangpui rih lo turin thupek a siam tih Vawiin khan Serchhip West Block MNF chuan thuchhuah siamin an tarlang a. Serchhip West Block MNF thuchhuah chuan, "ZPM Unit 1, Thenzawl ten an hek avangin Thenzawl Vengthar Village Council, MNF sorkarna hi 18.9.2026 khan Mizoram sorkar chuan a thiat (dissolve) a, VC mawhphurhna (charge) pawh 29.09.2026 khan Field Inspector, DLAO Office, Serchhip kutah a dah nghal a ni. Thenzawl Vengthar VC hi Dan kalha thiah nia a lan avangin Gauhati High Court, Aizawl Bench-ah khinlet a ni a, High Court chuan thu tlingah ngaiin, 16.10.2026 khan ngaihtuah zui turin a pawm a ni," an ti a. "Hetih mek lai hian 5.11.2026 khan State Election Commission chuan member 3 awmna, Thenzawl Vengthar VC tiamin, VC inthlanna neih dan tur leh vote thlak hun turte hriattirna a ti chhuak a, hemi chungchang hi vawiin khan High Court-ah hian sawi a ni a. Court chuan thubuai in chiah lai WP(C) 154/2026 chu chinfel anih hma chuan inthlanna buatsaih lo turin thupek a siam a ni," an ti bawk.
Serchhip West Block MNF thuchhuah chuan Thenzawl Vengthar a MNF party VC ṭhiah a ni hi rem leh rem lova, Chief Minister bial a ZPM sorkar in thuneihna a leknaah an ngaih thu leh pawi an tih thu sawiin, "Tunhnuah hetianga mahni party VC ni lo, a thim a var pawh thlu lova ṭhiah tumna ang chi hi thleng tawh lo se kan duh tak meuh a. Court a thu kal zelah pawh dikna in hnehna a chan a, MNF party VC hi dan dik taka a din leh ngei kan beisei tak meuh meuh a. Hemi atana dikna duha hmalatu Advocate Pu J. Malsawmzuala Vanchhawng, General Secretary, MNF General Headquarters chungah pawh Serchhip West Block MNF, Thenzawl chuan lawmthu kan sawiin, a kal zelna turah pawh duhsakna sang ber kan hlan a ni," an ti bawk.