Ramri chungchanga inbiak hun tur a la chiang lo
Home Minister K. Sapdanga’n Akashvani News a hrilh danin Mizoram Home Department hotute’n November thla laihawla Aizawl-a inbe tura rawtna an siam chu Assam sawrkar hian a la rawn chhang lo a. Hei hi thil awmdan a nih avangin ramri buai chingfel tura inbiak hun hi a chiang thei ta rih lo niin a sawi. Mizoram Home Department rawtna hi a inchiah rei thawkhat tawh a, Assam sawrkar hian an rawn chhan mai loh chuan kumin ah inbiakna hi buatsaih hman a nih tur leh tur loh a hriat ta lo a ni.
Mizoram leh Assam ramri buai chingfel tur hian State sawrkar pahnih Official-te hi nikum April ni 25 khan Guwahati-ah an inbe tawh a. Hemi tuma an inbiakna-ah hian inbiak chhunzawm thuai tur leh inbiakna chu Aizawl-a nghah turin thu an dah na a, kumin April thla a Assam Assembly inthlan leh chhan dang dang avangin chhunzawm theih a ni ta lawk lo a. State pahnih official-te an indawr reng chungin Assam sawrkar lam hian rawtna fumfe an neih har avangin inbiak leh hun hi a khawtlai ta a ni.
Kilometre 164 leh metre 6 a thui Mizoram leh Assam inkar ramri buaina chungchangs official-te inbiakna hnuhnung ber, nikum April ni 25 khan ramri hnaih a ram inchuhte sawiho a ni a. Tuna dinhmun ngai anga thil kalpui a ramri a harsatna siam lo turin a tawn tawnin an intiam a. Mizoram lam hian ‘Bengal Eastern Frontier Regulation, 1873 tlawhchhana Assam nena an inkar ramri atana British sawrkarin kum 1875 a hriattirna a chhuaha Inner Line Reserve chin a rin chu ramri dik tak a ni’ tiin tuna Assam hnuaia awm ram mel 509 chu Mizoram a ni tiin a hauh a. Assam chuan Bengal Eastern Frontier Regulation, 1873 tlawhchhan tho a kum 1933 a Assam Chief Secretary-in ramri a lo rin chu an pawm thung a ni.