Zirlai rawn zin ten Larsap an kawm
Inter-State Educational Tour nei-a Mizoram rawn tlawh mek Dima Hasao, Assam-a zirlaite chuan nimin khan Mizoram Larsap, General (Dr) Vijay Kumar Singh chu Aizawl-a Lok Bhavan ah an kawm a, Larsap General (Dr) Vijay Kumar Singh chuan heng Dima Hasao atanga zirlai lokal te hi lo lawmin, an cham chhungin Mizo hnam ziarang, nunphung leh tawng te a tam thei ang ber zir tum turin a chah a. Chin dan tha leh entawn tlakte hawna nunpui tum tura fuihin, Zirlaite chu mahni nuam tihna hmunah chauh awm lova hna zawnga hmundang-a chhuah hreh lo turin a fuih a, zirna ngai pawimawh tur leh thil thar zir zel tum turin a chah bawk.
Heng zirlaite hi Assam Rifles leh Haflong a innghat NGO, A Ray of Hope Society buatsaiha rawn kal te niin Larsap chuan Tribal zirlaite chawi-kan nana Ray of Hope Society hmalakna chhuanawm a tih thu sawiin, Educational Tour an neih theih nana ruahmanna siam saktu Assam Rifle-te fakawm a tih thu a sawi bawk a. Zirlaite hian zawhna an neihte chu Larsap zawtin an inkawm a ni. He hunah hian Brig. Puspendar Sorayan, DIG, 23 Sector Assam Rifles; Mithun Sarkar, Founder Member, A Ray of Hope leh Official dangte an tel bawk a ni.
