District Hospital sak mek-a lei che awm nia lang tukin ah enfiah a ni dawn

Serchhip District Hospital sak mek-a Block B sakna tur laih a nih hnuah lei che a awm nia hriat a nih avangin tukin hian enfiah tum a ni.
Nimin khan Serchhip DC Meeting Hall-ah District Hospital Serchhip sak mek chungchang ngaihtuah hian thutkhawm hmanhmawh neih niin he huna tarlan a nih danin Serchhip-a District Hospital building thar sak hna thawh mekah, Block B hmun tur hi laih tan ni tawhin October 2026 atang khan ruahtui leh leimin thei laka fimkhur thilah Casualty/Trauma Ward bul hnai chu laih chhunzawm rih loh a ni a. November 2026 thla tir lam atang khan hmun thenkhatah lei/chhuat khi a awm tih hriat a ni a, hei hian District Hospital Casualty/Trauma Building vel huamin a structure pui ber, a banpui leh beam te erawh chu a him nia hriat a ni; hetih rual hian fimkhur thilah heng Ward te hi tihruah niin Gynae Ward-ah insawn chhuah rih a ni thung a ni.

Nimin-a thutkhawm hmanhmawh neih hi Addl. DC, Dorothy Muansangi chuan kai-hruaiin a rang lama helai hmunhmate endik turin Geologist chah nghal an ni a, tukin hian Addl. Deputy Commissioner Dorothy Muansangi hovin khawtlang hruaitute nen Joint Inspection neih a ni dawn a. Meeting-ah hian chak zawka hnathawh a nih theih nan hna thawhna bungrua leh hmanrua (rod, balu, rawra etc) dahkhawlna tur hmunhma chungchang pawh relin sawnchhuah tura ruahman a ni.

He thutkhawm ah hian Serchhip Bawrhsap Paul L. Khuma chuan helai lei che nia hriat ah hian chak taka hmalak zui nghal a nih tur thu a sawi a, he  hna thawktu Contractor - SK Construction te pawh thahnemngaia theihtawp chhuah turin a chah bawk a ni.

District Hospital Serchhip Block B Building hi NESIDS Fund cheng vbc. 50 hmanga sak mek a ni a, sanction hmuh fel tawh a nih avangin hna hi thawh zui mek a ni.