Vantawng leh Tuirihiau Developmental Works atan inrawnkhawmna nei
Tourism Department leh Irrigation & Water Resources Department te tangkawp buatsaih he sawihona ah hian Tourism Department leh Irrigation & Water Resources Department Official-te bakah Thenzawl, Buangpui leh Kanghmun 'S' khawtlang hruaitute leh NGO hrang hrang aiawhte an tel a Irrigation & Water Resources Department-a Secretary leh State Level Coordination Committee-a Chairman, Er. Lalrothanga chuan kaihruaiin Thenzawl leh a chhehvel khuaah te khualzin hip thei tur Khuanuin a dah sa a tam em em a, heng kan hausakna neih sate hi tangkai taka chhawr a nih theih nan sawrkar leh khawtlang mipuite inlungruala an thawhho that a pawimawh hle dawn tih a sawi bawk.
Nimin-a he hun hman ah hian Irrigation & Water Resources Department-a Superintending Engineer, Er. Laldingliana Hrahsel chuan he project hnuaia ruahmanna leh hmalakna turte a lem nen a sawifiah a, zawhna leh chhanna hun te hman a ni bawk. Vantawng leh Tuirihiau-a hmasawnna hna kalpui turah hian Tourism Department chuan ‘Vantawng View Aerial Ropeway & Associated Infrastructure’ tih project, cheng vbc. 34.50 man a kalpui dawn a. Irrigation & Water Resources Department chuan ‘Vantawng–Tuirihiau Integrated Water Conservation and Eco-Tourism Project’ tih project, cheng vbc. 9.84 man an kalpui dawn bawk a ni. Heng project pahnihte hmang hian Vantawng leh Tuirihiau-a tourism hmasawnna, tui humhalh leh khualzinte tana hmun nuam leh hmantlak zawk siam tura ruahman a ni a. Heng hmalaknate hian Thenzawl leh a chhehvel khua te tourism lama hmasawnna a thlen bakah khawtlang mipuite tana eizawnna kawng thar a hawn theih beisei a ni.
