RD&AD in VB-G RAM G sum pek danah mipui rilru hruai kawi tumna a awm niin an sawi

Rural Development and Administration Department chuan Viksit Bharat-Gurantee for Rozgar and Ajeevika Mission (Gramin) (VB-G RAM G) hnuaia State Matching Share leh State Budget Mizoram Sawrkarin a pe thei lo ti-a sawi ah mipui rilru hruaikawi tumna a awm niin an sawi.
Hemi chungchanga nimin-a thuchhuah an siamah Rural Development and Administration Department chuan June 9, 2026 khan Union Minister for Rural Development, Shivraj Singh Chouhan hova Video Conferencing neih ah 1st July 2026-ah ram pumah VB-G RAM G hman a nih tawh dawn avangin Mizoram, Jharkhand, Karnataka leh Telengana te chu VB-G RAM G atan State Budget peih thuai tura a tih thu sawiin, Union Minister in hetiang-a a sawi lai hian VB-G RAM G hi la hman a nih loh thu leh MGNREGA la hman niin Mizoram pawhin July 1, 2026 hma ngeia State Budget neih tumin Finance Department nen hma a la mek tih an sawi a. June 10, 2026 khan Ministry of Rural Development chuan Mizoram tan VB-G RAM G-ah Interim Budget cheng vbc. 611.65 rawn pein Central Share an rawn pek hnu lawk, June 17, 2026-ah Mizoram Sawrkar, Finance Department chuan 10% State Matching Share heng vbc. 67.96 pawh RD&AD-ah a pe ve nghal tih an tarlang a, July 1, 2026 hmain Mizoram Sawrkar chu State Budget Allocation cheng vbc. 67.96 nen VB-G RAM G atan hian a in peih tawh tih an sawi bawk.

RD&AD chuan VB-G RAM G hi hman tur tih a hriat veleh Mizoram Sawrkar pawh nasa takin a in puahchah ve nghal tih sawiin, India ram-a State VB-G RAM G Scheme notification leh 60-days pause notification chhuah hmasa ber niin, Unemployment Allowance Rules, Delay Compensation Rules, Grievance Redessal Rules, State Council Rules leh VB-G RAM G Fund Rules te pawh State dangte hmakhalhin a chhuah vek tawh bawk tih an tarlang a. Hei bakah VB-G RAM G hnuaia mipui inhlawhna sum hi mipui hnena a luh dan hi tunhma aiin a kual ta deuh tih pawh sawiin, hetianga thubelh chian dawllo, mipui rilru hruaikawi thei thil chhuah fo hi tha an tih loh thu te pawh an tarlang bawk a ni.