Ramchhunga Gas Pipeline zawm turin inbuatsaih
Tunhnaia a Pisa-a thuthar thehdarhtute a kawmnaah he thu hi sawiin Supply Minister B. Lalchhanzova chuan eirawngbawlna Gas chu ramchhunga pipeline nena thlunzawm anih theih nan Northeast Gas Grid Project hnuaiah hmalak mek a ni tih sawiin, ruahmanna chu Mamit District leh Aizawl District-a kalpui hmasak tur niin nakum-ah Mamit khawpui a luh hman beisei a nih thu a sawi a. Aizawl chu kum 2028 ah thlunzawm hman beisei a nih thu a sawi bawk.
Zawhna chhangin Minister B.Lalchhanzova chuan Mizorama Oil Depot siam turin HPCL bakah IOCL lam te nena Oil Depot siam tura indawrna a la kal zel tih sawiin, Mizoram-ah tuialhthei avanga harsatna lian a thlen loh nan Oil Depot siamna tur hmunhma pawh Oil Company te hnenah man awm lova pek mai theih beisei a nih thu a sawi a, India ram himna thlir tel chung-a Mizoram in Oil Depot a neih chu tih makmawh a ni tih a sawi bawk.
Supply Minister chuan Supply Department chuan Technology hrang hrang hmangin ration buhfai sem danah leh buhfai phurh kual danah a intuaithar chho mek tih sawiin, sawrkar laipui thuchhuak angin buhfai buk dik lo in pek theih loh tur leh buhfai latu turin a la ngei a ni tih tihchianna turin Retailer-te ePoS leh buhfai bukna khawl - Digital Weighing Scale (DWS) chu tun thla, November-a thlunzawm kim hman an tum thu a sawi a. Hei bakah hian te buhfai hralhna hlep leh Retailer-te buhfai phurh man ti pung turin hma an lak thu sawiin, Retailer te’n buhfai an phurhna rate chu khaw hrang hranga Supply Godown hlat leh hnaih dan a zirin a danglam tih a sawi a, Buhfai phurh kual chu uluk taka vil turin Mizoram chuan software chi thum - Supply Chain Management System (SCMS), Route Optimization Tool (ROT) leh Vehicle Location Tracking System (VLTS) hmangin vil a ni dawn tih a sawi. FCS&CA Minister chuan Ration atana thlakhat buhfai mamawh zat chu quintal 91,000 a nih thu leh kum hmasa lam aiin quintal 1,45,374 in buhfai lei a tlem zawk tih a sawi a, a tlem zawkna hi a pawisa a chhut chuan Rs. 52,18,92,660 a ni tih a sawi a. Hei bakah hian kumin December thlaa buhfai eitur quintal 54798.33chu tunah hian FSD (FCI) hrang hrang pasarih atanga lift mek a ni tih a sawi bawk.
