MPSC Chairman ban phutin thawktu dang thlak an phut

Mizo Students Union (MSU) chuan MPSC Chairman chu a hna a tlin lo tih sawiin, a hna atanga bang turin an phut a, Mizo Zirlai Pawl (MZP) pawhin MPSC Secretary leh Controller of Examinations te chu thlak tura an phut thu an sawi bawk.
MSU hian MPSC-in tunhnaia hna a lak dan chungchang ngaihtuahin, tunhnai kum hnih chhung ringawta an tihsual siamthatna vawi 20 chuang a chhuah chuan thil fel tawk lo a awm tih a hriat thu leh thalai hna zawng mek te-ah MPSC Chairman rintawk lohna a nasat tawh avangin MPSC Chairman chuan thalai hna zawng mek te ngaihtuah chungin a mawh ah lain ni nga (5) chhung ngeia bang tura an phut thu an sawi a, a ban duh loh chuan rampum huapa nasa zawka hmalak an rel a ni.

Hei bakah hian MSU chuan Food, Civil Supply & Consumer Affairs (FCS&CA) Department-a Store Keeper hna 15 lak a MPSC-in mark a pek dan chungchanga tihsual chu ni 10 chhung ngeia siamthat anih theih nan hmalak nise an ti a, MPSC chhui chiangtu tur High Level Inquiry Commission chu thla khat (1) chhung ngeia din anih theih nan sawrkar-ah rawtna thlen nise an ti bawk a. MPSC hnalak muang lutuk leh buaina a tam avangin hnalakna felfai zawk leh chak zawka a awm theih nan Group B Gazetted chunglam leh Group B Non-Gazetted hnuai lam chu Controller of Examination hran ve ve-a lak a nih theih nan hmalak nise an ti bawk a. MPSC Website/Portal Version 2.0-ah hian hna zawng mek ten harsatna an la tawh avangin ennawn a thuamthat leh nise an ti a. Technical line ho tan document upload-na tur pawh hi tun aia changtlung zawka siam a nih theih nan hmalak nise an ti bawk.

Nimin khan MZP General Hqrs. pawhin thuchhuah siamin tun hnaia thil thleng hrang hrang thlirin MPSC chuan insiamthat an tum lo hle tih a lang chiang nia sawiin, MPSC hnalak a mawhphurtu Secretary leh Controller of Examinations hi November ni 20, 2026 (Zirtawpni) ralhma ngeia thlak a, mi thar ruat turin sawrkar thuneitute an phut thu an sawi a, MPSC Reform Committee in a thla hnih (2) chhung ngeia rawtna (recomendations) hrang hrang ngaihtuah tur an nih laia huntiam chhung zawh tawh hnu pawh a MZP leh thalai hnazawng (Aspirants) te’n a Reform Committee hnena an thlen tun thlenga an la ngawih bo pui reng chu mak an tih thu an sawi a, Zirlaite leh thalai hnazawng (Aspirants) mekte zah lohnaah ngaiin, Sawrkar thuneitute chn a rang lama ngaihtuah tur leh thuthar an neih vat an phut nghal thu an sawi a. FCS&CA Department hnuaia Storekeeper hnalak chungchangah tunkar chhung ngeia Inquiry Committee din tur leh report pawh thla khat (1) chhung ngeia peih turin thuneitute an phut thu an sawi bawk a ni.