MJA in Bawrhsap lawmpuina hlan
Serchhip Bawrhsap lawmpuina leh chawimawina hun hi MJA (SD) Vice President Lalremruata Ralte chuan kaihruaiin MJA (SD) President, Kapliana Pachuau chuan Khawvel pian tirh ata la awm ngai lo India Hmarchhak pum, North East State zawng zawnga sawrkar hna thawk tha ber ‘Namaste Award 2026’ Serchhip District Bawrhsap in a dawng chu thinlung takin an lawmpui thu leh Serchhip District mipuite chauh pawh ni lovin, Zoram mipui zawng zawngin an lawmpui ve ngei a rin thu a sawi a. MJA Serchhip District hmingin Memento, Thangchhuah Diar leh Tawlhloh Puan a hlan bawk.
Serchhip Bawrhsap, Paul L. Khuma pawhin he chawimawina a dawn theihna hi, sawrkar hna a thawhpui te, Serchhip District mipui, Kohhran leh NGO hrang hrang, VC leh MJA ten an thawhpui that vangte pawh a nih thu sawiin, lawmthu a sawi a, Serchhip District MJA ten a puala chawimawina hun an lo buatsaih chu lawmawm a tih thu sawiin, a pawimawh ber leh a bul leh a tawp chu Pathian a nih thu leh, Pathian-a innghat chunga ram leh hnam rawngbawl zel a tum thu a sawi a; sawrkar hnathawkte hi rawngbawlsak a awm tur ni lovin, rawngbawltu tur zawk an ni tih hre thar leh theuh turin a chah bawk.
Nimin tlai-a he hun hman ah hian Ser-chhip DC Office-a SDC, Vanthangpuia chuan India hmarchhak State 8 atanga nomination 400 chuang lut zingah Serchhip DC Paul L. Khuma’n ‘Namaste Award 2026’ a dawn theihna tura tehna hrang hrang a paltlang dan tarlangin, sawrkar Department bakah mipuite nena thawhhona tha (convergence) siam kawnga a hmalaknate chuan endiktute ngaihhlut a hlawh thu a sawi bawk.
