Mizo Palian Inchai-ah Lalsangliana hneh thei an la awm lo
LPS Arena, Falkland-a Mizo Inchai Title Fight-ah hiaan Chief Minister Lalduhoma chuan Mizote hi mi chak ngaisang hnam kan ni tih sawiin, “Indonaah te, ram chhuahna ah te, kuthnathawh tinrengah an tangkai a, khaw-tlang mipuite pawhin an thlamuanpui thin,” a ti a. Tunhnuah kan nunphung lo danglamin kan ngaihhlut zawng danglam mah se kan hnamzia humhim chu thangthar ten kan tih tur a nih thu leh kan hnam infiamna pawh hi kan chhawmnung zel tur a ni tih a sawi a. “Japan mipuite pawhin hmakhawsang ata an infiamna Sumo Wrestling hi Vawiin thlengin an la ngaihlu a, Thai mipuite pawhin Muaythai chu an chhawm nung reng a, inchai pawh hi Greece mipuiten BC 700 chho ah an lo khel tawh thin. Olympic-ah pawh inchai hi discipline langsar zinga mi a ni. A nihna takah chuan inchai hi Mizo infiamna zinga Olympic item awmchhun a ni hial awm e,” a ti a. “Olympic inchai dan zirna hmanrua ah hmang ila, kan ram leh hnam chawimawi nan kan hmang thei a ni,” tiin Sawrkarin Olympic 2036 thlir chunga Mizo infiammite tana hma a lakna te a sawi a, Inchaiah ngei pawh hmalakna a kalpui thu a tarlang bawk.
Zirtawpni zan-a Mizo Inchai Title Fight-ah hian Palian Champion nilai Lalsangliana chuan amah chotu Lalremtluanga, Chhangte, Zobawk, Lunglei chu hnehin a title a humhim a, he Inchai ah hian thawh lina laihawlah Remtluanga hi inhliamin a bei zui thei lova, an inchai chhungin 34-0 in Sangliana’n hma a hruai hman tho a, kum 2014 atanga a Title kawl chu kum 12 zet a humhim ta a ni. Nulian inchai-ah Champion lai Lalhmangaihsangi (Saichal/Zemabawk West) chuan amah chotu Zodinpuii hnehin a tum hnihna atan a Title a hum ve bawk a ni.