LMC Vice Chairman leh Executive Councillor thar lalut
Lunglei Municipal Council (LMC)-a Vice Chairman K. Lalrinawma'n banna a thehluh chu pawmsak a nih hnua LMC Chairman Lalzuithanga chuan Vice Chairman leh Executive Councillor thar te hi nimin khan Lunglei Convention Centre-a BoC Hall-ah Lunglei District Additional District Magistrate (ADM), Rochuangkimi Khenglawt chuan rinawmna thu tiam tirin a lalut a. LMC Vice Chairman leh Executive Councillor tharte lak luh inkhawm hi LMC Chief Executive Officer (CEO) HD. Lalpekmawia chuan a kaihruai a. Mizoram Municipalities Act, 2007 Section 14(2) leh Mizoram Municipalities (Procedure & Conduct of Business) Rules, 2007 Rule 33 tlawhchhana LMC Vice Chairman leh Executive Councillor tharte ruatna a chhiarchhuah hnuah Lunglei ADM chuan Vice Chairman leh Executive Councillor atana ruat tharte hi thu tiamtirin a la lut nghal a ni.
LMC Vice Chairman hmasa ber leh tang lai K. Lalrinawma chuan party lama mawhphurhna pawimawh a neih avangin November ni 2, 2026 khan LMC Chairman, Lalzuithanga hnenah Vice Chairman atanga banna a thehlut a. A banna thehluh hi pawm a nih hnuah November ni 10, 2026 khan LMC Board of Councillors (BoC) thukhawm chuan Executive Council insiamrem dan tur leh kal zel dan tur ngaihtuahin, he thutkhawm thutlukna ang leh danin thuneihna a pek angin LMC Chairman Lalzuithanga chuan November ni 16, 2026 khan Vice Chairman thar atan Zorinsanga Hmar leh Executive Councillor atan R. Lalremsiama te chu a ruat a. Vice Chairman leh Executive Councillor mawhphurhna la tur hian danin a phut angin lakluh an ni ta a ni.
Lunglei ADM Rochuangkimi Khenglawt chuan LMC Vice Chairman leh Executive Councillor atana lakluh tharte a lawmpui thu sawiin, an hna leh mawhphurhnate tha taka hlen chhuak thei turin duhsakna a hlan a. LMC chu pisa pawimawh tak a nih thu leh hmasawn zel tur a nih thu sawiin, a dinna la rei lo mah se, thawktute inpekna leh thahnem ngaihna avangin hma an sawn chak a tih thu a sawi a. LMC Chairman Lalzuithanga chuan LMC Vice Chairman K. Lalrinawma chuan political party lamah mawhphurhna pawimawh dang a chelh a ngaih avangin LMC Executive Council chu insiamrem ngai a nih thu sawiin, Vice Chairman kalchhuak ta hovin thawhhona tha tak neiin, hmasawnna hrang hrang hmuh a nih thu leh lawmawm a tih thu a sawi a. LMC chuan Lunglei khawpui leh a chhunga chengte hmasawnna turin theihtawp an chhuah tih a sawi bawk.
