Kumin ah Mizoram Police ten ruihhlo cheng vbc. 679 hu an man tawh niin sawi

Zoram Peoples Movement (ZPM) Thalai chuan kumin kumtir atanga November ni 6, 2026 thleng khan Mizoram Police ten ruihhlo Rs. 679,35,92,516 hu an man tawh niin an sawi.

Inrinni khan Aizawl Press Club-ah thuthar theh-darhtute kawmin ZPM Thalai President Jeje Lalpekhlua MLA chuan, “January 2026 atanga November ni 6, 2026 thleng khan Mizoram Police ten damdawi leh a kaihhnawih bikah hian avaiin Case 347 ziaklutin, mi 515 lakah thubuai ziahluh a ni a, Rs. 6,79,35,92,516 /- man hu a chhut a ni,” a ti. ZPM Thalai in Mizoram Police ruihhlo man nia a sawi te chu Heroin-ah case 240 siam tawhin, kg. 45.688 a ni a, Rs. 91,37,76,200 hu an man a, India khua leh tui mi 283 leh ramdang mi 61, a zavaiin dan bawhchhia mi 344 man an ni.

Methamphetamine chu kg. 607.05 man tawh niin case 73 ziahluh tawh a ni a, Rs. 4,85,63,92,000 hu a chhut a ni a, India khua leh tui mi 94 leh ramdang mi 29, an zavaiin mi 193 man an ni a. Crystal Meth ah Case 2 ziahluh ni tawhin kg. 20.628 a ni a, Rs. 61,88,40,000/- man a ni a, he case ah hian India khua leh tui mi pakhat leh ramdang mi mipakhat man an ni. Ganja pawh kg. 60.458 man tawh niin, case 14 ziahluh tawh a ni a, Rs. 45,22,900/- man nia chhut niin, he case ah hian India khua leh tui mi 17 leh rampawn mi pakhat lakah case siam sak an ni.

Opium-ah case register zat 7 niin kg. 145.192 man niin Rs. 7,25,96,000/- hu a chhut a ni a, he case ah hian India khua leh tui mi 11 lakah thubuai siam a ni. Morphine pawh kg 32.494 man niin, Rs. 32,49,40,000 /- man zet a tlinga, Case 7 ziahluh niin India khua leh tui mi 11 lakah thubuai ziahluh a ni a. Heng data an lakkhawm hnu, Nov. 8, 2026 khan Saitual Police Special Team-te chuan Kualmawi Keifang-ah Heroin ni ngeia hriat gram 733 manin Nov. 9, 2026 khan Zokhawthar lam Police te pawhin Methamphetamine ni ngeia hriat kg 3.275 leh Heroin ni ngeia hriat gram 145 an man belh leh tawh thu an sawi a ni.