Kan rama khualzin pung karah Mizo hmeichhia te himna ngaih pawimawh a tul thu sawi

Social Welfare, Women & Child Development Minister Lalrinpuii chuan kan rama khualzin pung karah Mizo hmeichhia te himna ngaih pawimawh a tul thu a sawi.
National Commission for Women leh Mizoram State Commission for Women (MSCW) tangkawp buatsaihin nimin khan Aizawl-a Planning & Programme Implementation Department (RDB) Conference Hall-ah ‘The Mizoram Prevention of Immoral Traffic Rules,1996’ chungchangah inrawnkhawmna neih a ni a, he hun ah hian Social Welfare Minister Lalrinpuii chuan Mizoram chu khualzin tlawh tamna hmun a lo nih chhoh zel thu leh kum kalta chhung khan khualzin nuai nga chuangin Mizoram an tlawh tuh sawiin, kumin ah pawh khualzin an pung nasa hle tih a sawi a, khualzin pung zel hian ram tana hlawkna a thlen theih rualin, Mizo hmeichhiate himna ngaihpawimawh a tul thu sawiin, Hmeichhiate himna leh an dikna humhalh kawnga Dan awmte tha taka hman a pawimawh thu a sawi a. Mizo hmeichhiate tana Dan kan neih mekte zirchianna hun tha tak buatsaih a ni chu lawmawm a tih thu a sawi bawk.

Social Welfare, Women & Child Development Minister Lalrinpuii chuan Immoral Traffic (Prevention) Act-in nawhchizawrhna leh a kaihhnawih thil tih a khap angin, chutiang thil tihpuitu leh hmeichhia zawnsaktute pawh Dan anga hrem theih an ni tih sawiin, Nawhchizawrhna hmun (Brothel) siamtute leh mahni In leh hmunhmate chutiang atana hmantirtu chu na taka hrem theih an nih thu a sawi bawk a. Hmeichhiate himna hian Zoram nuam a siam a, Mizo hmeichhiate himna leh an dikna humhalhna kawnga tih theih leh bawhzui theih apiangah theihtawp chhuah a inhuam thu a sawi bawk.

He hunah hian Women and Child Development Director, Zoramthangi Chhangte chuan Dan tha tak awm ringawt a tawk lo tih sawiin, Department leh Institution hrang hrangte thawhhona te leh a tuartute humhalh leh enkawl danah te hian Dan hlawhtlinna a innghat tih a sawi a. Women & Child Development Department mawhphurhna pawimawh tak takte sawiin, “Chhanchhuahte himna tur hmun ngaihtuah te, damdawia enkawlna te, rilru lam inenkawlna te, Counselling, Zirna leh Skill Development bakah eizawnna kawng an zawh theihna tur puihna pekte a ni,” a ti a. Mizoram State-ah hemi kawnga hmalakna chi hrang hrang - Anti-Human Trafficking Units, Special Police Officers, ITPA Section 21 hnuaia din Maumual Protective Home, Mission Shakti hnuaia One Stop Centre leh Shakti Sadan te an awm thu sawiin, Institution leh Facility awm ringawt hi a tawk lo tih a sawi a, Department hrang hrangte mawhphurhna, Referral Procedure, Case Management leh follow-up support te chiang taka ruahman a tul thu a sawi bawk.