Journalist rintlak, ram khalh ngilna tura thu pawimawh leh dik chauh buatsaihtu ni zel turin Press mite chah

Nimin November 16, 2026 khan ‘National Press Day 2026’ chu Aizawl-ah Chief Minister Lalduhoma hovin hman a ni a, Chief Minister chuan Journalist rintlak, ram khalh ngilna tura thu pawimawh leh dik chauh buatsaihtu ni zel turin Press mite chu a chah a ni.
‘Journalism: Populist or Responsible?’ tih thupui hmanga I&PR Auditorium, Aizawl-a ‘National Press Day 2026’ ah hian Chief Minister Lalduhoma chuan mipui rorelna ramah chuan rorelna lungthu palina, Fourth Estate ti hiala sawi thin, thuthar thehdarhtute hnathawh chu ram siamthat nana thil pawimawh tak a nih thu a sawi a. India ramin zalenna a hmuh theihna tura hmanraw tangkai tak an ni tih sawiin, India-in zalenna kawng a zawh chhung pawh khan mipui rilru tih pumkhat nan leh ram hmangaihna thinlung kaihthawhna hmanraw tangkai tak a nih thu a sawi a. Chutiang a nih avang chuan Sawrkar pawhin Press mite zalenna hi a ngai pawimawh tih sawiin, “Press mite zalenna humhim nan leh Media ethics tha tak vawn nun nan Press Council of India chu November ni 16, 1966 khan din a ni a. Chu ni chu Vawiin thleng hian National Press Day atan hman a ni,” a ti.

Chief Minister chuan thuthar lakkhawm, buatsaih leh thehdarh kawngah thu tak, thu dik leh rintlak, thlei bik leh duhsak bik nei lo, thu dik dinchhuahpui thei tura thuneihna nei (Independency), mimal nun zahawmna vawn sak chunga hnathawk thiam, mahni thu lakna (Source) te sahimna ngaihtuah sak, midang thuziah rukchhawn laka fihlimmi, mipui rilru-a inhuatna leh inthenhranna thlen thei thu ziah loh leh ram leh mipui tana rawngbawltu an ni tih hre chunga Media hna chu thawh tur a nih thu a sawi a. Khawvel changkanna in-a a ken tel, Digital Media chu tangkai taka hmang tura inherrem ve zel a tul thu sawiin, Mizoram chu India ram State zingah 1st Digital State nih tumin a inbuatsaih mek thu leh Cheque hman ngai tawh lova indawrtawnna kalpui thei turin ruahmanna a awm mek thu a sawi bawk.

Chief Minister Lalduhoma chuan chhiartu leh thlirtu duh luat vangin Media platform thenkhatah chuan thu belhchian dawl lo leh dik tawk loh deuh tichhuak duh maite an awm thin tih sawiin, a chhe zawngin mimal nun nasa takin a nghawng phah theih thu a sawi a. Journalist rintlak, ram khalh ngilna tura thu pawimawh leh dik chauh bautsaihtu ni zel turin Press mite chu a chah bawk a ni.

National Press Day puala Aizawl-a hun hman ah hian Khual Zahawm, I&PR Minister B. Lalchhanzova pawhin ram leh sawrkar khalh ngilna kawngah Press mite chu thawktu pawi-mawh tak an nih thu sawiin, Sawrkar hnuaia hamthatna awm hrang hrangte pawh ennawn leh siamthat a nih thu a sawi a. Chung zingah chuan Ex-Gratia ennawn te, Assistance to Accident and Critical illness-te leh Sawrkar Advertisement rate pawh ennawn a nih thu a sawi bawk.

He hunah hian I&PR Director Mina Zoliani Joute chuan kalkhawmte lawmna thu sawiin, thuthar lakhawmtute hnathawh pawimawh zia leh an hmalaknate ngaihhlut nachang kan hriat zual zel theih nan National Press Day 2026 lawmna chu Directorate of Information & Public Relations leh Media lama a thawhpuite nen tangkawpa buatsaih a nih thu a sawi a. IPRP&S Secretary Betsy Zothanpari Sailo chuan khawvel changkanna in a ken tel Digital Media Platform hman tangkai thiam zel a tul thu sawiin, Advertisement policy puitling, Print Media mai bakah Electronic Media huam tel tur duan mek a nih thu leh chu chu a taka hman tangkai thuai beisei a nih thu a sawi bawk.

Nimin-a he hun hman ah hian Journalist thawk tha pahnih HC. Vanlalruata, Documentary Emmy Awards dawngtu leh Dr Lalnunkimi Colney, Kalyan Barooah Memorial Media Recognition dawngtute hnenah chawimawina thilpek hlan a ni bawk.