Fa lak leh a kaihhnawih dan leh hraite zirhona hun Aizawl-ah buatsaih a ni

Rampum-a ‘National Adoption Awareness Month’ hman mek pualin nimin khan I&PR Conference Hall, Lianchhiari Run-ah Fa lak leh a kaihhnawih dan leh hraite zirhona hun, ‘Adoption Awareness Workshop’ neih a ni.
Directorate of Women and Child Development hnuaia State Adoption Resource Agency (SARA) leh Central Adoption Resource Authority, Ministry of Women and Child Development-te tangkawp he zirhona hun hi Gauhati High Court, Aizawl Bench-a Registrar, Dr. HTC. Lalrinchhana chuan khuallian nia hmanpuiin Adoption leh a kaihhnawih Dan leh hraite hriatchian chu a enkawltu Department te mawhphurhna chauh ni lovin, mi zawng zawng mawhphurhna a ni tih hriat tlan a pawimawh thu a sawi a. Adoption chu naupang te dikna leh chanvo humhimna leh an hmakhua venhim sakna bakah naupangte chhungkaw him leh thaa an seilen theihna tura hmanraw pawimawh tak a ni tih a sawi a. “Dan kalh a adoption tih hi naupangte Fundamental Rights bawhchhiat sakna anih mai bakah dinhmun himlo a dintir thei tu a ni,” tiin Dan hnuaiah chauh adoption tih a nih theihna turin mi zawng zawng kan tanrual a tul thu a sawi a. Chumi atana Fa lak chungchang zirhona Workshop changtlung tak buatsaih a ni chu lawmawm a tih thu a sawi bawk.

Sawrkar laipui Ministry of Women & Child Development hnuaia Central Adoption Resource Authority (CARA) chuan kum 2020 atang khan November thla hi ‘National Adoption Awareness Month’ atan a ruata. Kumtin thupui bik neiin India ram pumah November thla chhung hian Adoption chungchang inzirtirna Campaign hrang hrang neih thin niin, kumin Awareness month thupui atan hian ‘Legal Adoption: Safe Childhood, Secure Future, Say No to Illegal Adoption’ tih hman a ni.

Nimin-a Workshop hawnna pual inkhawm hi Women and Child Development Director, Zoramthangi Chhangte chuan kaihruaiin kalkhawmte lawmna thu a sawi a. Chairperson ho vek hian Adoption Month pual thutiam, Dan dik tak chauhva Fa la tur leh chumi atana midangte pawh zirtir ve tura intiamna pawh kalkhawmte hian an chham rual nghal a. Vinita Jha, Deputy Director, Central Adoption Resource Authority, New Delhi-in Workshop buatsaih chan te sawifiahin, Dan lova adoption kalpui theih a nih dan chungchang a sawifiah a. Mission Vatsalya-a OSD  C. Lalnunfela chuan lawmthu sawiin hun a hmang bawk a ni.