‘Winter Capital of India’ ah siam tum
Niminpiah tlai-a Aijal Club-a Mizoram chhung leh pawna thuthar thehdarhtute a kawmna ah he thu hi sawiin, Tourism Minister chuan Mizoram chu ‘Winter Capital of India’ a siam turin nakum January thla thleng Kut hrang hrang duan a nih thu a sawi a. Hnahsin Kut chu Champhai-ah hman mek a ni tih sawiin, November ni 11 atanga ni 13 thleng Leitlangpui Music Festival chu Serkawn, Lunglei-ah neih a nih leh dawn thu a sawi a. Tourism Department buatsaih Kutpui ber ‘Winter Festival’ chu December ni 15 atanga ni 23 thleng Aizawl Lammual-ah neih a ni dawn tih sawiin, Winter Festival hnuaiah hian Tlaizawng Paradise Festival chu December ni 17 leh 18-ah Phuaibuang-ah neih a ni anga, December ni 23-ah naupang te pualin Aizawl khawpui chhungah ‘Christmas parade’ neih a nih dawn thu leh December 31-ah Sakawrhmuituai tlang-ah a huhova ni tla thlirhona hun buatsaih a ni leh dawn tih a sawi a, Sakawr-hmuituai tlang chu India rama Ni tla mawina ber ni-a a hriat thu a sawi a. Nakum January ni 2 khian Darzo khuaah hmanlai atanga an lo tih thin, ‘Chepa Nunchan’ entirna hun hman a nih tur thu a sawi bawk.
Thuthar thehdarhtute zawhna chhangi, Tourism Minister chuan, Mizorama rawn zin tura India khua leh tui ten ILP an mamawh thu leh ram dang atanga rawn zin tur ten PAP (Protected Area Permit) an mamawh thin thu sawiin, ILP-ah chuan harsatna a awm tam lo a, foreigner tana phut PAP permit chu an thuneihna piah lam a nih avangin harsatna tawk an awm tih an hria a. Hemi chungchangah hian hma an la mek a, Winter Festival Chairman Chief Minister Lalduhoma chuan Winter Fest hunlai chuan PAP chu inthlahdul turin thuneitute hnenah a ngen tih a sawi bawk a ni.