'Solid Waste Management Rules 2026' chungchang zirhona Serchhip-ah buatsaih a ni

Nimin khan Serchhip-ah khawtlang hruaitu- Community Based Organisation (CBO) leh Self-Help Group (SHG) Member te tan 'Solid Waste Management Rules 2026' chungchang zirhona neih a ni.
UD&PA Department leh Wash Institute te tangkawp in UD&PA Department Conference Hall-a 'Solid Waste Management Rules 2026' chungchang zirhona an buatsaih ah hian District Urban Development Officer (DUDO) Gaston Vanlalhriatpuia chuan Swachh Bharat Mission (SBM)2.0 hnuaiah bawlhlawh chi hranga thliarhran dan leh sawngbawl dan inzirtirna hi kalpui a nih thu a sawi a, Environment Protection Act 1986 hnuaia duan thar 'Solid Waste Management Rules 2026' khauh tak hnuaiah tun dinhmunah New Serchhip VC Area-ah bawlhlawh tawih thei leh tawih thei lo fel taka thliarhranna hlawhtling taka kalpui anih tawh thu leh Serchhip khawpui lamah pawh bawlhlawh thliarhran chu kalpui chhoh zel a nih dawn thu a sawi a, hemi atan hian bawlhlawh paih motor pawh ruahman belh zel anih dawn thu a sawi a. Bawlhlawh thliar-hran leh sawngbawl dan tur Dan thar Supreme Court in Order a lo tihchhuah tawh leh District Bawrhsap pawhin a lo puanzar tawh 'Solid Waste Management Rules 2026' chungchang inhrilhhriatna leh inzirtirna chu kumin October atanga December thla chhung hian Serchhip khawpui a khawtlang hruaitute leh NGO's hrang hrangah kalpui chhoh zel anih dawn thu a sawi bawk.


Nimin-a he hun hman ah hian 'Solid Waste Mangement Rules 2026' chungchang hi UD&PA Serchhip-a Sanitation Inspector Obed Lalhuliana'n kalkhawmte hnenah a lem nen-a entirin a sawifiah a, Swachh Bharat Mission (SBM) in a tum tlangpui te, Mizo pipu nun atanga faina leh thianghlimna kawnga kan lo kal chhoh tawh dan te, bawlhlawh chi hrang hrang leh an nihphung atanga thliarhran pawimawhna te bakah kan environment tana Plastic hlauhawm dan te, bawlhlawh tawih thei atanga leitha siam dan (Home Composting) te, bawlhlawh chi 4-a thliarhran dan turte chu a zirtir bakah a tul angin zawhna leh chhanna hun hman a ni a, he huna khawtlang hruaitu kalkhawm (CBOs) leh SHGs te chu a takin chi 4-a bawlhlawh thliarhran dan a taka neihpui an ni bawk.