IWRD Minister-in Public Safety and Disaster Response Communication System a tlangzarh
Aijal Club RB Mc Cabe Hall-a thutkhawm ah hian IWRD Minister PC. Vanlalruata chuan hetiang project lian, tangkai leh rotling hawng theia a awm chu lawmawm a tih thu a sawi a. PSDRC chu Project lian leh sum pawh hautak tak a nih thu sawiin, “Amaherawhchu Mizoram chu kan hriat theuh anga chhiatrupna thlen theihna sang tak (Highly Vulnerable)-a awm kan nih avangin he project hi kan tangkaipui hle dawn a ni,” a t ai. Mizoram in tlawmngai pawl tha tak tak kan nei chu lawmawm a tih thu sawiin, chhiatna liantham tawhin sawrkar mai ni lo, tlawmngai pawlte nen tha an thawhho thin chu hmuh a nuamin a ropui takzet tih a sawi bawk.
He huna hian Aizawl DC Er. Lalhriatpuia IAS chuan Technical Report pein Mizoram leilung dinhmun avangin chhiatrupna thlen thulhah communication tha kan mamawh hle tih sawiin, “He khawl hi antenna hmang a ni a, Physical wire awm lovin signal dawn nan electromagnetic wave a hmang dawn a ni,” a ti bawk a. He Project khawihtu FC TecNergy Company aiawh pawhin anmahni chu Alternate Energy Communication lama Specialize an nih thu leh India ram hmun hrang hranga an lo thawh tawh thin thu a sawi a. Mizoram-ah pawh kum tam tak an lo thawh tawh thu sawiin, tuna an khawl chuan chhiatrupna avanga current a awm loh hunah pawh darkar 100 tal chu inbiakpawhna a buai dawn loh thu a tarlang bawk.
Public Safety & Disaster Relief Communication (PSDRC) System hi chhiatrupna thlen laia chhanhimtute (SDRF, Police, Fire Services) inbiakpawhna a chah (breakdown) loh nan a duan a ni a. He system mechanism bulpui ber chu inbiakpawhna hmanrua tangkawp (overlapping communication) a ni a, a pui ber (primary) atan Aizawl khawpuiah DMR Tier-III Trunking Network hman a ni a, Kolasib, Champhai leh Lunglei District-ah te DMR Tier-II Conventional network hman a ni thung. Hemi puitu atan hian Mizoram pum huapa hman theih turin 4G/5G Broadband kaltlangin Mission Critical Communication System (MCCS) a awm bawk.
Heng network pahnihte hi State Emergency Operation Center (SEOC), Aizawl-ah thlunzawm a ni a. Heta tang hian dispatcher-te chuan DMR leh MCCS hmangtute chu hmun khatah bepawpin thupuan (broadcast) an pe chhuak thei a ni. Call zawng zawng record thlap a nih bakah, GPS kaltlangin a hmangtute awmna hmun hriat theih a ni bawk. Harsatna thlen laia network leh hmanruate a thih mai loh nan Fuel-cell Hybrid Power leh Solar hmangin darkar 100 chhung nung turin power backup dah a ni.