CM-in College tan Bus pe
Chief Minister Lalduhoma chuan Govt. Mizoram Law College zirlaite hman tur 24-Seater SML Bus thar chu nimin khan he College hotute leh zirlai hruaitute kutah a hlan a, CM Office tual-a Bus inhlanna hunah Chief Minister chuan he Bus thar hi naupangten tangkai taka an hman a beisei thu a sawi a, India ram huapa Dan lama thiamna sang ber ber nei thei khawpa inbuatsaih tura chahin duhsakna a hlan a ni. Kumin July ni 31 khan Chief Minister hian Govt. Mizoram Law College Freshers Social & Felicitation Programme hmanpuiin College Student Bar Council hruaituten an College Bus hman lai hlui tawhzia an lo sawi a. Kum 2005 Registration, Polytechnic School-in kum 15 an hman tawh hnu an chhawm zui tak niin zirlai naupangte tana a him tawk tawh loh dante an tarlang a. Chief Minister hian Bus thar a pek tur thu puangin hemi bawhzui nan hian Bus thar hi hlan a ni ta a ni.